ეროვნული გმირის, ილია ჭავჭავაძის დისშვილის, კოტე აფხაზის ისტორიული სასახლე სამშენებლო მასალების საწყობად არის ქცეული

საზოგადოება - 18:34, 03 Feb, 2019

3140

ეროვნული გმირის, ქართველი გენერალისა და პოლიტიკური მოღვაწის, ილია ჭავჭავაძის დისშვილის კოტე აფხაზის სასახლე სამშენებლო მასალების საწყობად გადაქცეული. ისტორიული შენობა თითქმის მთლიანად დანგრეულია. მე-17 - მე-18 საუკუნეების საგვარეულო სასახლეს რამდენიმე წელია ძარცვავენ და სამშენებლო მასალები მიაქვთ. აფხაზების სახლ-კარის ეზოში საშენი მასალა და ნარჩენები ყრია.

სასახლის ეზოში დაყრილი სამშენებლო მასალა და ნარჩენები კერძო მესაკუთრეს ეკუთვნის, რომელიც სასახლის გვერდზე ღვინის კომპანიას და სასტუმროს აშენებს. მეპატრონის თქმით, ის სახლის ეზოს აფხაზების შთამომავალთან შეთანხმებით იყენებს და არ გამორიცხავს, რომ ძეგლის ტერიტორია შეისყიდოს კიდეც. მეპატრონე უარყოფს სოფელში გავრცელებულ ინფორმაციას, რომ მშენებარე სასტუმრო ბიძინა ივანიშვილის დეიდაშვილს - უჩა მამაცაშვილს ეკუთვნის.

სასახლე აფხაზის შთამომავლებმა 2007 წელს სასამართლოს ძალით დაიბრუნეს. მანამდე, წლების განმავლობაში, შენობა სახელმწიფო საკუთრებაში იყო და 1946 წლიდან 90-იან წლებამდე იქ ბავშვთა სახლი ფუნქციონირებდა. ძეგლის მესაკუთრე კოტე აფხაზის შთამომავალია, რომელთან კომუნიკაციასაც გურჯაანის მერიის წარმომადგენლები ამ დრომდე ვერ ახერხებენ. ადგილობრივ ბიუჯეტში ისტორიული შენობის რესტავრაციისთვის თანხა გათვალისწინებული არ არის, თუმცა სურვილის შემთხვევაშიც, მესაკუთრის თანხმობის გარეშე, თვითმმართველობა ძეგლის მოვლა-პატრონობაზე ვერ იზრუნებს.
-------

_{კონსტანტინე (კოტე) აფხაზი (27 ნოემბერი, 1867, კარდანახი ― 20 მაისი, 1923, თბილისი) — ქართველი საზოგადო, პოლიტიკური და სამხედრო მოღვაწე, საქართველოს დემოკრატიული რესპუბლიკის ეროვნული არმიის (1918) არტილერიის გენერალ-მაიორი, საქართველოს ეროვნული საბჭოს წევრი (1917-1919), ეროვნულ-დემოკრატიული პარტიის ერთ-ერთი დამფუძნებელი (1917) და ამ პარტიის თავმჯდომარე (1921-1923), თბილისის სახელმწიფო უნივერსიტეტის დამფუძნებელი საზოგადოების თავმჯდომარე (1918), 1921-1923 წლების ეროვნულ-განმათავისუფლებელი მოძრაობის ერთ-ერთი ლიდერი, საქართველოს დამოუკიდებლობის კომიტეტის წევრი და სამხედრო ცენტრის ხელმძღვანელი (1922-1923), რუსულ საოკუპაციო რეჟიმის წინააღმდეგ ხევსურეთის აჯანყების ერთერთი ხელმძღვანელი (1922).}_{1923 წლის თებერვალში, გენერალი კონსტანტინე აფხაზი კომუნისტური რუსეთის საოკუპაციო ხელისუფლებამ დააპატიმრა და იმავე წლის 20 მაისს დახვრიტა თბილისში, დღევანდელი ვაკის პარკის ტერიტორიაზე.}