სიმღერა "თბილისოს" ბრიტანული ასლი - რევაზ ლაღიძის ოჯახი სამართლებრივი დავის დაწყებას აპირებს

საზოგადოება - 16:25, 28 Jan, 2019

1992

რევაზ ლაღიძის ოჯახი ლეგენდარულ კომპოზიცია „თბილისოს“ ავტორობასთან დაკავშირებით სამართლებრივ ბრძოლას იწყებს. ამის შესახებ განცხადება ოჯახის ადვოკატმა გააკეთა. ადვოკატის თქმით, ეჭვქვეშ არ დგას საკითხი, თუ ვინ დაწერა სიმღერა და აპირებს სამართლებრივი დავა დაიწყოს Warner Music-თან, რომელსაც კომპოზიტორ ჯერი სკოტის საავტორო უფლება ეკუთვნის.

„რევაზ ლაღიძის „თბილისო“ შეიქმნა 1958 წელს, თბილისის 1500 წლის იუბილეზე, რომელიც არის უტყუარი ფაქტი, უტყუარი გარემოება და ეს სადავო არ არის. მეორე მნიშვნელოვანი გარემოება არის, რომ თვითონ ეს ჯერი სკოტის ჩანაწერი, რომელიც საზოგადოებამ მოისმინა, არის დათარიღებული 1962 წლით. ანუ ამ ორ გამოცემას შორის არის 4 წელი განსხვავება, რაც მნიშვნელოვანი ვადაა და ცალსახად შეიძლება დავადგინოთ, რომ რევაზ ლაღიძის „თბილისო“ არის ორიგინალური ნაწარმოები, ხოლო ჯერი სკოტის მიერ გამოქვეყნებული ჩანაწერი არის მის შემდეგ გამოქვეყნებული გადამუშავებული ვერსია.“ - განაცხადა ზურაბ ბეჟაშვილმა.

რევაზ ლაღიძის უკვდავი სიმღერის „თბილისოს“ პრემიერა 1958 წელს შედგა და მას შემდეგ ჰიტად ქცეული კომპოზიცია არაერთი შემსრულებლის რეპერტუარში მოხვდა. 1961 წელს საბჭოთა კავშირს ბრიტანელი ჯაზმომღერალი ჯერი სკოტი სტუმრობდა, რომელმაც 1962 წელს ახალი ფირფიტა გამოუშვა, რომელშიც ის „თბილისოს“ მელოდიაზე სიმღერას ასრულებს, ფირფიტაზე სიმღერის ავტორებად კი თავად ჯერი სკოტი, იგო ფიშერი და ვინმე ასქვისი არიან მითითებული, რევაზ ლაღიძე კი არსადაა ნახსენები. ამის შესახებ popmusic.ge წერს.

„თუ ჯაზის ისტორიის უბადლო მცოდნე არ ხართ, 1923 წელს ინდოეთში დაბადებული ბრიტანელი შემსრულებლის, ჯერი სკოტის შესახებ ალბათ არც კი გსმენიათ. ჩვენც სრულიად შემთხვევით გადავაწყდით მის ერთ-ერთ ჩანაწერს სახელწოდებით Stay With Me და წარმოიდგინეთ ჩვენი გაოცება, როდესაც სიმღერის მელოდიაში მშობლიური "თბილისოს" ჰანგები ამოვიცანით, ინგლისურენოვან ტექსტში კი ჭაღარა მთაწმინდისა და ნარიყალას ნანგრევების კვალიც ვერ აღმოვაჩინეთ. არტისტი მზისა და ვარდების მხარის ნაცვლად, საყვარელ მამაკაცს უმღერის.

კიდევ უფრო უცნაურად მოგვეჩვენა ის გარემოება, რომ 1962 წელს გამოშვებულ ფირფიტაზე სიმღერის ავტორებად თავად ჯერი სკოტი, იგო ფიშერი და ვინმე ასქვისი არიან მითითებული, რევაზ ლაღიძე კი არსადაა ნახსენები.“- წერია popmusic.ge-ის მიერ გამოქვეყნებულ სტატიაში.

სტატია სრულად იხილეთ ბმულზე "თბილისო", ჯერი სკოტის STAY WITH ME და რევაზ ლაღიძის საავტორო უფლებები