25 იანვარს, თბილისის სახელმწიფო სამედიცინო უნივერსიტეტის ორგანიზებით, თსსუ-ის პირველ საუნივერსიტეტო კლინიკაში მწვავე ვირუსული დაავადების–წითელას მასიური გავრცელების პრევენციის მიზნით ჩატარდა საინფორმაციო კამპანია, რომელიც მოიცავდა ვირუსის შესახებ მოსახლეობის ცნობადობის დონის ამაღლებას, სწორი ჩვევების დანერგვასა და პრევენციული ღონისძიებების წახალისებას. ღონისძიების ფარგლებში მოხდა თბილისის სახელმწიფო სამედიცინო უნივერსიტეტის მოხალისე სტუდენტების აცრა ვირუსზე. ორგანიზატორების განმარტებით თსსუ-ის პირველ საუნივერსიტეტო კლინიკაში საყოველთაო აცრა ყველა მსურველისთვის იქნება უფასო, ხოლო აღნიშნული აქცია უნდა გახდეს მისაბაძი მაგალითი როგორც სხვა უნივერსიტეტის სტუდენტებისათვის, ასევე ზოგადად მთელი საზოგადოებისთვის.

პროფილაქტიკური აცრების ეროვნული კალენდარი ითვალისიწინებს წითელა-წითურა-ყბაყურას საწინააღმდეგო ორჯერად აცრებს 1 და 5 წლის ასაკებში.

ნებისმიერმა აუცრელმა და/ან არასრულად აცრილმა პირმა აუცილებლად უნდა მიმართოს სამედიცინო დაწესებულებას და ჩაიტაროს ვაქცინაცია!

თსსუ–ის საუნივერსიტეტო კლინიკა მზადყოფნას გამოთქვამს ყველა მსურველს გაუწიოს შესაბამისი დახმარება.