სპორტსმენების ნაწილი გეგა გეგეშიძის გათავისუფლების მოთხოვნით ჭდაობის ფედერაციის შენობასთან იკრიბებიან. ისინი სპორტის სასახლეში მომხდარ ფაქტზე საუბრობენ და აცხადებენ, რომ მომხდარი იყო ინციდენტი და ფედერაციაში შიდა გარჩევით უნდა დასრულებულიყო.

„არაფერი დანაშაული არ იკვეთება, არ იყო იქ ცემა, არც ძალადობა იყო, შეხლა-შემოხლა იყო,“ - განაცხადა თავისუფალი სტილით მოჭიდავეთა ნაკრების მთავარმა მწვრთნელმა გიორგი იანტბელიძემ.

ლუკა კურტანიძე შექმნილ მდგომარეობას არასასიამოვნოს უწოდებს და აცხადებს, რომ თავად ფედერაციის პრეზიდენტიც აცნობიერებს აღნიშნულს:

„მდგომარეობა რაც არის შექმნილი, არის არასასიამოვნო და გეგაც ამას აცნობიერებს და ყველა. პასუხისმგებლობას არავინ არ გაურბის, მაგრამ ერთი არის, რომ ჭიდაობის სამყაროს უნდა მიეცეს იმის საქმიანობის საშუალება, რასაც აკეთებდა. რაც მოხდა, ვთანხმდებით იმაში, რომ ყველა ვაცნობიერებთ იმას, რაც მოხდა და პასუხისმგებლობასაც არ გავურბივართ,“ - განაცხადა მსოფლიოსა და ევროპის მრავალგზის ჩემპიონმა, ლუკა კურტანიძემ.

სპორტსმენები მიიჩნევენ, რომ გეგეშიძის დაკავებით ხელისუფლების მხრიდან წითელი ხაზები გადაიკვეთა და ისინი ჭიდაობის ფედერაციის პრეზიდენტის დაუყოვნებლივ გათავისუფლებას მოითხოვენ:

„დაკავებას არ ველოდოთ იმიტომ, რომ რაღაც ფიზიკური, თუნდაც ჩხუბი დაარქვი, პატარა აყალმაყალი, მაგის გულისთვის არცერთ სპორტში და მით უმეტეს ჭიდაობის ოჯახში, არ უნდა ხდებოდეს. ძალადობას მე არ ვეძახი ეგეთ ჩხუბს. დასაჭერი არ იყო. სასამართლოს უნდა ემსჯელა. მთავრობამ წითელ ხაზს გადააბიჯა,“ - განაცხადა მსოფლიო ჩემპიონმა თავისუფალი სტილით ჭიდაობაში, ზურაბ იაკობიშვილმა.