ლიბიაში გაუჩინარებული 23 წლის ქართველი მეზღვაურის დედა ნინო ცეცხლაძე ამბობს, რომ დავით რაზმაძეს ბოლოს 6 იანვარს ესაუბრა, რა დროსაც დავით რაზმაძემ დედას უთხრა, რომ რამდენიმე დღეში საქართველოში დაბრუნებას აპირებდა, რადგან მუშაობა აღარ შეეძლო.

ნინო ცეცხლაძე გამორიცხავს, რომ მისი შვილი გარდაცვლილია.

„აყვანილი გვყავს ადვოკატი, გაგზავნილი მაქვს ყველაფერი, რაც ამ ბავშვის დნმ-ისთვის გამოდგება. ვნახოთ, რა იქნება, ჩემი მეუღლე უნდა წავიდეს ლიბიაში.

ჩვენი ბოლო ზარი იყო ექვსში. დათუნამ მითხრა, დედი რამდენიმე დღეში გაგაგებინებ პასუხს. წამოსვლა უნდოდა ნაოსნობიდან. აღარ მინდა მუშაობაო. ყველაფერი დაფიქსირებულია, წერილი მომწერა “ - ამბობს ნინო ცეცხლაძე.

ნინო ცეცხლაძე საქართველოს ხელისუფლებას დახმარებას სთხოვს და მისი პირველი მეუღლის დამსახურებაზე საუბრობს:

„დათუნას მამა, ზაზა რაზმაძე, რომელმაც ოფლი და სისხლი დაღვარა ცხინვალის ომში, აფხაზეთი ბოლომდე, ჭუბერი ბოლომდე ფეხით გადმოიარა, სიცივეში, შიმშილში, ჩვენ თავშესაფარი ვითხოვეთ საქართველოსგან, მე და ჩემმა შვილმა, მაგრამ საქართველომ გვითხრა, თქვენ არაფერი გეკუთვნითო, 2008 წელს, მე მივმართე გორს დახმარებისთვის, მაგრამ საერთოდ ხელი არავინ გაგვიწოდა. მე იძულებული გავხდი, რომ წამოვსულიყავი საქართველოდან, შემდეგ შევქმენი აქ ოჯახი და ბავშვი დავტოვე მშობლებთან. ნუთუ, ასეთი გმირის შვილი, ასეთი მამის შვილი შეიძლება გვერდზე გასწიო. დათუნას მამა, მართლაც, გმირი იყო. ახლა მაინც დამეხმაროს მთავრობა, ახლა მაინც იფიქროს ჩემს შვილზე. საქართველოს მრცხვენია, მრცხვენია, როგორ ვთქვა მე ეს ყველაფერი,“ - ამბობს ნინო ცეცხლაძე.

ქართველი მეზღვაური 7 იანვარს ლიბიის ერთ-ერთი პორტიდან გაუჩინარდა. დავით რაზმაძის მამის ძმა და მისი მეუღლე 2008 წლის ომის დროს, გორის ვერხვების დასახლების დაბომბვისას დაიღუპნენ.