მოსკოვის შერემეტიევოს აეროპორტში ანასტასია ვაშუკევიჩი, იგივე ნასტია რიბკა დააკავეს. დაკავების ვიდეო რუსულ მედიაში ვრცელდება.

ვიდეოში ჩანს, როგორ ცდილობენ ახალგაზრდა ქალის ეტლში ძალით ჩასმას და ისმის მისი ხმა, რომ არ სურს არსად წასვლა. საბოლოოდ ის ხელით მიჰყავთ.

ბელორუსი ვაშუკევიჩი და რუსი ალექსანდრ კირილოვი, ცნობილი როგორც ალექს ლესლი შერემიეტევოს აეროპორტში გუშინ დააკავეს, სადაც ისინი ტაილანდიდან დეპორტაციის შემდეგ ჩამოფრინდნენ. მათ იქ პირობითი სასჯელი ქონდათ მისჯილი სექს-ტრენინგების უკანონო ორგანიზაციის შექმნნის გამო. რუსეთში ვაშუკევიჩი, კირილოვი და კიდევ ორ პირი ეჭვმიტანილები არიან სხვა პირების პროსტიტუციაში ჩართვის დანაშაულში. ამ დანაშაულისთვის მაქსიმალური სასჯელი 6 წლიანი პატიმრობაა.

ნასტია რიბკა ცნობილი გახდა ალეკსეი ნავალნის კორუფციასთან ბრძოლის ფონდის მიერ ჩატარებული გამოძიების შემდეგ. ნავალნის ორგანიზაციის მიერ წარმოებული გამოძიების მასალებში იყო რიბას ინსტაგრამ პუბლიკაციები და ფრაგმენტები მისი წიგნიდან, სადაც ის ჰყვებოდა ბიზნესმენ ოლეგ დერიპასკისთან და მთავრობის ყოფილ ვიცე-პრემიერ სერგეი პრიხოდკოსთან ერთად იახტაზე დასვენების შესახებ. ნავალნი ამ ფაქტს მთავრობის წევრის მიერ მიღებულ ქრთამად აფასებდა.

ვრცელდება ინფორმაცია, ნასტია რიბკას მიერ გაკეთებულ განცხადებაზეც, მისი თქმით, მას მოეპოვება იმის მტკიცებულება, რომ კრემლი დონალდ ტრამპს საპრეზიდენტო არჩევნებში ეხმარებოდა.