ჭყონდიდელი მიტროპოლიტი მეუფე პეტრე ცაავა სხალთის მთავარეპისკოპოსის მეუფე სპირიდონის მიერ მისი მისამართით გამოთქმულ ბრალდებებს პასუხობს. ვრცელ წერილში, რომელიც მეუფე პეტრემ გაავრცელა, საუბარია ციანიდის საქმეზე, სადაც მიტროპოლიტი ხაზს უსვამს, რომ დეკანოზი მამალაძე უდანაშაულოა და ის მხოლოდ „უზნეობისა და უსამართლობის მსხვერპლია“.

მიტროპოლიტი მიიჩნევს, რომ უსამართლობსათან დაპირისპირება არ ნიშნავს პატრიარქთან დაპირისპირებას, ხოლო, მისი თქმით, ამ ყველაფრის პატრიართან დაპირისპირებად წარმოჩენა, ისევ და ისევ უწმინდესის დისკრედიტაციას ემსახურება.

„ციანიდის საქმის რეზონანსულობის მიუხედავად თქვენგან არასდროს გვსმენია ამ საკითხზე საჯაროდ გამოხატული აზრი. ნუთუ, მართლა გჯერათ, ეკლესიისთვის მეტად შეურაცხმყოფელი და ცინიკური ვერსიისა, რომ დეკანოზი ციანიდით მიემგზავრებოდა გერმანიაში პატრიარქის მდივან-რეფერენტის მოსაწამლად და ამ ბოროტებას სჩადიოდა კარიერული წინსვლისათვის. ანუ მკვლელ და დევნილ დეკანოზს საქართველოს ეკლესიის წმინდა სინოდი ეპისკოპოსად გამოარჩევდა და აკურთხებდა?! მაშინ როდესაც, როგორც დეკანოზი იხსენებს კათოლიკოს პატრიარქი ციანიდის საქმემდე რამდენიმე თვით ადრე პირადად სთავაზობდა მას ახალი ეპარქიის შექმნას ქობულეთში და მღვდელმთავრად გამორჩევას, თუმცა მამაომ ამ შეთავაზებაზე თქვენგან განსხვავებით თავი ღირსად არ ჩათვალა და უარი განაცხადა! თქვენ კი ამ ყველაფერზე გვავალდებულებთ დუმილს? ისევე როგორც, თქვენის აზრით უნდა დადუმებულიყო ეკლესია 80-იან წლებში უდანაშაულო მღვდლის დახვრეტისას? ისევე როგორც უნდა დადუმებულიყო ავადსახსენებელი 90-იანების მოვლენებისას? ისევე როგორც უნდა დადუმებულიყო კრემლის დავალებით ეროვნული და კანონიერი ხელისუფლების იარაღით დამხობისას, თქვენის ჩათვლით? ესეთი აზროვნება ხომ საბჭოთა მემკვიდრეობაა და სამწუხაროდ თქვენი სიტყვიდან და ქადაგებებიდან გამომდინარე თქვენში დავინახე საბჭოთა ადამიანი, მწყემსი კეთილის ნაცვლად.“ - წერს ჭყონდიდელი მიტროპოლიტი.

სხალთის ეპისკოპოსმა ​სპირიდონმა ქადაგებისას მეუფე პეტრე გააკრიტიკა და პატრიარქის წინააღმდეგ ქმედებებში დაადანაშაულა.