დიდ დიღომში აფეთქებული კორპუსის მე-9 სართულზე მაცხოვრებელი ილია ბუზალაძემ, მედიასთან მომხდარის დეტალებზე ისაუბრა. მისი თქმით, მთელი დღის განმავლობაში საშინელი გაზის სუნი იგრძნობოდა, რის გამოც შესაბამისი სამსახურები ორჯერ უშედეგოდ გამოიძახეს. როგორც ის აცხადებს აფეთქებამდე რამდენიმე წუთით ადრე მან ლიფტით იმ მამაკაცთან ერთად იმგზავრა, რომელიც აფეთქების შედეგად გარდაიცვალა.

„დღის განმავლობაში მეზობლებმა დარეკეს ორჯერ, მე სამსახურში ვიყავი და საქმის კურსში ვიყავი, ორჯერ მოსულან წავიდნენ და ნახევარ საათშ ისევ დაურეკეს და მოვიდნენ. მეზობლები როგორც ამბობენ, დაგვიცინესო რა... ვიღაცაო გაზის ბალონს აიტანდაო. დაახლოებით საათნახევარ-ორსაათში მოხდა ეს ამბავი. ლიფტში რომ შევედით მე და ის პიროვნება სუნი იდგა და აღვნიშნეთ... ის მეექვსე სართულზე გავიდა, მე მეცხრეზე ავედი, გამოვედი თუ არა... ახლა როგორც გავიგე ის პიროვნებაა გარდაცვლილი ვინც ჩემთან ერთად იმგზავრა. შესულა ბინაში, აუნთია შუქი და ... ორი ნაბიჯით გამოვასწარი და გადავრჩი. კიბით ჩამოვედით.

კორპუსის მშენებელს ხელი არ მოაკიდებინა ყაზტრანსგაზმა, მათი გაყვანილია ყველაფერი სახლებშიც თვითონ ჩართეს, გუშინ მოსულები იყვნენ და არსად არაა ხარვეზიო მაგრამ სუნი მაინც იდგა, ხომ უნდა ენახათ, რომ თუ სადარბაზოში არაა ე.ი ბინაშია სადღაც , არ შეამოწმეს და წავიდნენ. სადაც აფეთქება მოხდა, ეს ბინა როგორც გავიგე მისი არ ყოფილა. მეგობარს უთხოვია ასვლა და შემოწმება, დახედე სახლსო. აფეთქება მოხდა ერთ ბინაში და დაღუპულები არიან გვერდითა ბინაში, კედელი გაიტანა აფეთქების სიმძლავრემ“- განაცხადა ილია ბუზალაძემ.