დიდი ბრიტანეთის პარლამენტმა ბრექსიტის გეგმას მხარი არ დაუჭირა

დიდი ბრიტანეთის პარლამენტმა ბრექსიტის გეგმას მხარი არ დაუჭირა - ტერეზა მეის გადაყენება ემუქრება

მსოფლიო - 11:12, 16 Jan, 2019

1653

დიდი ბრიტანეთის პარლამენტმა ბრექსიტის შეთანხმებას მხარი არ დაუჭირა. კანონმდებლებმა პრემიერ-მინისტრ ტერეზა მეის გეგმა დიდი უმრავლესობით, 432 ხმით 202-ის წინააღმდეგ უარყვეს.

გეგმა ევროკავშირიდან ბრიტანეთის გასვლის პირობებს შეეხებოდა, რომელზეც ბრიტანეთის მთავრობამ და ევროკავშირმა ნოემბერში მოილაპარაკეს.

კანონით ტერეზა მეის კიდევ სამი დღე აქვს იმისთვის, რომ პარლამენტს ბრექსიტის ახალი სამოქმედო გეგმა შესთავაზოს.

ბრიტანეთმა ბლოკი 29 მარტს უნდა დატოვოს. ექსპერტების განცხადებით, ამ გეგმისა და გარკვეული შეთანხმების გარეშე ბრიტანეთის ეკონომიკას ქაოსი ემუქრება.

ბრიტანეთის ოპოზიციური ლეიბორისტული პარტიის ლიდერმა ჯერემი კორბინმა პარლამენტს მიმართა წინადადებით გაერთიანებული სამეფოს მთავრობისთვის უნდობლობის გამოცხადების შესახებ. ამ საკითხზე კენჭისყრა ოთხშაბათ საღამოს გაიმართება. პრემიერ-მინისტრ ტერეზა მეის გადაყენება ემუქრება.

ევროკავშირის ლიდერებმა ბრიტანეთის პარლამენტში კენჭისყრის შედეგებს სამწუხარო უწოდეს და მოუწოდეს ბრიტანეთის მთავრობას, ბრექსიტის შესახებ მომდევნო ნაბიჯები, რაც შეიძლება მალე განმარტოს.