"ჩემი სოლიდარობა და მხარდაჭერა ჯვრის მონასტერს და მის წინამძღვარს"- ეკა ბესელია

საზოგადოება - 10:53, 16 Jan, 2019

1258

"ქართული ოცნების" დეპუტატი ეკა ბესელია ჯვრის მონასტრის ჩაკეტვას ეხმაურება და მონასტრის წინამძღვარს სოლიდარობას უცხადებს.

ბესელია ამბობს, რომ მან, როგორც იურიდიული კომიტეტის თავმჯდომარემ მცხეთის მუნიციპალიტეტს არაერთხელ მიმართა კანონის აღსრულების მიზნით.

"ჩემი სოლიდარობა და მხარდაჭერა ჯვრის მონასტერს და მის წინამძღვარს. ვიცი, რამდენად რთული იყო მისთვის ამ გადაწყვეტილების მიღება. უკიდურეს მდგომარეობამდე მიიყვანეს მოძღვარი. 1997 წლიდან მრევლი ვარ ამ მონასტრის და ვიცნობ მამა კონსტანტინეს, როგორი დიდბუნებოვანი და საოცრად კარგი ადამიანია.

რამდენი ხანია, ცდილობს მოაგვაროს ეს პრობლემა. ვინ არ შეაწუხა... უამრავი სტუმარი ჩამოდის და მონასტრის წინ ისეთი ანტისანიტარიაა და მოუწესრიგებლობა, რომელიც ვერანაირ კრიტიკას ვერ უძლებს. რაც მთავარია, კანონი ირღვევა, გარევაჭრობა აკრძალულია. უნებართვოდ ხდება ამ ადგილას ვაჭრობა.

არ ვიცი, ვისი ინტერესია, რომ რეაგირება არ ხდება... მე პირადად მივმართე არაერთი წერილით მცხეთის მუნიციპალიტეტს როგორც იურიდიული კომიტეტის თავმჯდომარემ, გუბერნატორს კანონის აღსრულების მიზნით. რატომ არ ხდება კანონის დაცვა და აღსრულება - ამაზე უნდა ისაუბროს მერმა და პასუხისმგებელმა პირებმა. იმედია, სამართლებრივად მოგვარდება ეს საკითხი , ნაცვლად მონასტრის მოძღვრის გაკიცხვისა" - წერს ბესელია.