აჭარასა და გურიაში შესაძლა ციტრუსის ტონობით მოსავალი გადაყარონ. გლეხები აცხადებენ, რომ მოსავლის 90% დაზიანებულია. მიუხედავად ამისა, ადგილობრივები ვერც სარეალიზაციოდ ვარგისი მოსავლის გაყიდვას ახერხებენ. მოსახლეობა ხელისუფლებისგან დახმარებას ითხოვს:

„არის მანდარინი ჩასაბარებელი, კლიენტი არ არის, რომ ჩააბარო და ფულით ისარგებლო. თუ დალპება გადავყრი , მეტის საშუალება არ არის. ერთი კილოგრამი არ გამიყიდია. დანარჩენი აგერ არის და თქვენც ხედავთ, რომ ლპება. რამდენი დრო გადის, იმდენი აკლდება. რითი უნდა გადავიხადოთ მე არ ვიცი. თუ ჩამომაწერენ კრედიტს,როგორღაც კიდევ პენსიით გაიტანს კაცი. ხომ ხედავთ ხალხს ყველას უჭირს, გაჭირვებული ყველაა," - ამბობს შოთა აბუსელიძე.

გლეხების თქმით, ციტრუსი დაზიანდა მას შემდეგ, რაც ხელისუფლებამ სოფლებში ​ფაროსანას საწინააღმდეგო შეწამვლითი ღონისძიებები ჩაატარა.

„რაც ფაროსანას წამალი გამოუშვეს და დაწამლეს, ამის შემდეგ მოხდა ეს ყველაფერი. წლევანდელ მოსავალს ვერ ვასაღებთ. მოკლედ ციტრუსი გააშავა, გააფუჭა როგორც ასეთი 80% მინიმუმ მაინც,“ - აცხადებს ჯუმბერ აბუსელია.

ბრალდებებს უარყოფს აჭარის სოფლის მეურნეობის მინისტრი:

„უხარვეზოდ მიმდინარეობდა ციტრუსის სეზონი. მე ვერ ვიტყვი, რომ მოსახლეობას გაუჭირდა წელს ციტრუსის რეალიზაცია, პირიქით დღეს ქობულეთში არის ხარისხიანი ციტრუსის დეფიციტი. დღესაც მქონდა კონტაქტი კომპანიებთან, რომლებიც ექსპორტზე მუშაობენ და ქობულეთის მუნიციპალიტეტიდან უნდათ გაიტანონ ექსპორტზე ციტრუსი და დადიან მოსახლეობაში, რომ შეაგროვონ ხარისხიანი ციტრუსი. რაც შეეხება უხარისხო ციტრუსს, მუშაობს გადამამუშავებელი ქარხანა, რომლებიც 24 საათის განმავლობაში ამუშავებს მიღებულ პროდუქტს და შესაბამისად არც მათ შექმნია ხარვეზი,“- განაცხადა ტიტე აროშიძემ.