ჩინეთსა და კანადას შორის ურთიერთობა იძაბება - კანადის მოქალაქეს ჩინეთში სასიკვდილო განაჩენი გამოუტანეს

მსოფლიო - 12:27, 15 Jan, 2019

2360

ჩინეთის სასამართლომ კანადის მოქალაქეს, რომელიც ნარკოტიკების კონტრაბანდის გამო პატიმრობაშია, სასჯელი სასიკვდილო განაჩენით შეუცვალა. კანადელი მამაკაცის ოჯახმა სასამართლოს გადაწყვეტილებას შემაძრწუნებელი და არაადამიანური უწოდა, კანადის პრემიერ-მინისტრმა ჯასტინ ტრუდომ კი პეკინი სასიკვდილო სასჯელის თვითნებურ გამოყენებაში დაადანაშაულა.

რობერტ ლოიდ შელენბერგის განაჩენი კიდევ უფრო გააუარესებს ჩინეთსა და კანადას შორის უკვე დაძაბულ დიპლომატიურ ურთიერთობებს, რომლის ერთ-ერთი მიზეზიც აშშ-ის მოთხოვნით, დეკემბრის თვეში, ვანკუვერში Huawei-ის ფინანსური დირექტორის დაკავება გახდა.

„ჩვენ ძალიან გვაღელვებს ის ფაქტი, რომ ჩინეთმა გადაწყვიტა თვითნებურად გამოიიტანა სიკვდილით დასჯის განაჩენი.“- განაცხადა ტრუდომ.

კანადის მოქალაქეს 15 წლიანი საპატიმრო ვადა გასული წლის 20 ნოემბერს მიუსაჯეს, თუმცა იანვრის თვეში ჩინეთის სასამართლომ ეს გადაწყვეტილება მეტისმეტად მსუბუქ სასჯელად ჩათვალა და ის სასიკვდილო განაჩენით შეცვალა.

რობერტ ლოიდ შელენბერგს გადაწყვეტილების გასაჩივრება 10 დღის განმავლობაში შეუძლია.

რობერტ ლოიდ შელენბერგი 2014 წელს დააპატიმრეს მას ბრალს სდებენ ჩინეთიდან ავსტრალიაში 227 კგ მეტამფეტამინის გადატანაში. შელენბერგი 36 წლისაა, ის ბრალს არ აღიარებს.