„მადლობა გადაუხადა პერსონალს... გაუგებარია, კლინიკიდან გაწერისთანავე იმიჯისშემლახავი პოსტის გამოქვეყნების მოტივაცია"- რესპუბლიკური საავადმყოფო უკმაყოფილო პაციენტის ბრალდებებს უარყოფს

საზოგადოება - 15:24, 11 Jan, 2019

2671

ბრიტანეთის მოქალაქის, ეკა ტიკარაძის მიერ "რესპუბლიკური საავადმყოფოს" მისამართით გამოთქმულ ბრალდებებს აღნიშნული სამედიცინო დაწესებულების მედიასთან ურთიერთობის ხელმძღვანელი ნატა ხურციძე ეხმაურება.

როგორც „რესპუბლიკური საავადმყოფოს“ პიარსამსახურში აღნიშნავენ, პაციენტს მკურნალობა სამედიცინო დახმარება პროტოკოლის სრული დაცვით ჩაუტარდა.

მეტიც, კლინიკაში ირწმუნებიან, რომ ტიკარაძეს სამედიცინო მომსახურების ხარისხთან დაკავშირებით პრეტენზია არ გამოუთქვამს:

„პაციენტმა ე.წ. გადაუდებელი მედიცინის დეპარტამენტს მომართა თვითდინებით, 10/01/19 წ. 03:30წთ-ზე, ჩივილებით: სუნთქვის გაძნელება, ხველა, მოხრჩობის შეგრძნება. მას გაეწია სამედიცინო დახმარება პროტოკოლის სრული დაცვით, ჩაუტარდა შესაბამისი დიაგნოსტიკურ-ლაბორატორიული კვლევები და პროცედურები ჰიგიენური ნორმებისა (რაც გულისხმობს, რომ პაცინტს გაეწია მომსახურება მედპერსონალისგან ხელთათმანით, პირბადით და ა.შ ) და პროტოკოლის სრული დაცვით მას შემდეგ, რაც დადგა დამატებითი კვლევების აუცილებლობა პაციენტს და მის ახლობლებს განემარტათ ამის შესახებ. პაციენტი გაეწერა კლინიკიდან დაზუსტებული დიაგნოზით 10/01/19 11:00 წთ-ზე, შესაბამისი დანიშნულებით, დამაკმაყოფილებელ მდგომარეობაში.

პაციენტს არ გამოუხატავს პრეტენზია ადგილზე სამედიცინო მომსახურების ხარისხთან დაკავშირებით. უფრო მეტიც, მადლობა გადაუხადა მორიგე პერსონალს. ჩვენთვის გაუგებარია, კლინიკიდან გაწერისთანავე პაციენტის მიერ სამედიცინო დაწესებულებისა და მისი მედპერსონალის იმიჯის შემლახავი პოსტის გამოქვეყნების მოტივაცია.

პაციენტმა შემოსვლისთანავე დააფიქსირა მხოლოდ უკმაყოფილება იმასთან დაკავშირებით, რომ რამდენიმე საათის განმავლობაში უშედეგოდ ცდილობდა სამედიცინო დახმარების მიღებას სხვადასხვა კლინიკაში. შემოსვლისთანავე განაცხადა, რომ იყო უცხოეთის მოქალაქე და დაიწყო გარკვევა ჩვენი კლინიკა იყო თუ არა მისი უცხოური დაზღვევის პროვაიდერი, რაზეც მედპერსონალმა განუმარტა, რომ პირველ რიგში, გაუწევდნენ ადეკვატურ სამედიცინო დახმარებას და პარალელურად გაარკვევდნენ დაზღვევა-დაფინასების საკითხს. პაციენტი მოთავსდა ობსერვაციის დარბაზში საწოლზე, რომელიც დამუშავებული იყო სადეზინფექციო ხსნარებით და გამოცვლილი იყო თეთრეული. მკურნალობის დაწყებიდან მალევე მდგომარეობა საგრძნობლად გაუმჯობესდა, რის შემდეგაც პაციენტმა უპასუხა თავისი სადაზღვევო კომპანიის სატელეფონო ზარს. საუბარი დაახლოებით 40 წუთი გაგრძელდა, რომლის დროსაც პაციენტს მუდმივად ახსენებდა მორიგე პერსონალი, რომ ინჰალაციის შეწყვეტა ავნებდა მის ჯანმრთელობას. მასსა და მორიგე პერსონალს შორის კეთილგანწყობილი კომუნიკაცია გრძელდებოდა გაწერამდე.

კლინიკას ქვეყანაში შექმნილი მდგომარეობის და მაღალი მომართვიანობის გამო, ღამის საათებში ამოეწურა ერთჯერადი ჭიქების მარაგი, რის გამოც პაციენტს ერთჯერადი სტერილური შპრიცით მიეწოდა წყალი, თუმცა, აღნიშნული მალევე გამოსწორდა. ღამის განმავლობაში პაციენტს კლინიკაში ყოფნის დროს მედპერსონალის მიმართ პრეტენზია არ დაუფიქსირებია, მთელი ღამის განმავლობაში მუდმივ რეჟიმში მიმდინარეობდა კომუნიკაცია მედპერსონალს, პაციენტსა და მის ახლობლებთან (დედა, შვილი).

ჩვენი კლინიკა ორიენტირებულია პაციენტზე, მომსახურეობის ხარისხის გაუმჯობესებაზე, მედპერსონალის კვალიფიკაცია კი მუდამ იყო და იქნება მაღალი.

ჩვენი კოლექტივი გისურვებთ ჯანმრთელობას!“- აცხადებენ „რესპუბლიკურ საავადმყოფოში“.

ბრიტანეთის მოქალაქე ეკა ტიკარაძემ "რესპუბლიკურ საავადმყოფოს" მძიმე ბრალდებები გუშინ წაუყენა. ქალი ყვებოდა, რომ ჰიგიენისა და მომსახურების კუთხით, საავადმყოფოში უმძიმესი პირობები დახვდა.