ხორავას ქუჩაზე მოკლული მოზარდის დავით სარალიძის მამა ზაზა სარალიძე სამართალდამცავებს პარლამენტის შენობასთან მიმდინარე აქციის მონაწილეების დაშინებასა და ზეწოლაში ადანაშაულებს. ზაზა სარალიძე რუსთაველის გამზირზე, შვილმოკლული მამების აქციაზე სამართალდამცავების მისვლის ფაქტს გამოეხმაურა. სარალიძემ ერთ-ერთი პოლიციელის იდენტიფიცირებაც შეძლო და აღნიშნა, რომ იგი სავარუდოდ გიორგი გადელია იყო. მისი თქმით, ძალოვანი უწყების წარმომადგენლების მიზანია, მიმდინარე აქციის შეწყვეტა აიძულონ შვილმოკლულ მამებსა და მათ მხარდამჭერებს. ზაზა სარალიძე ამ წუთებში ორ მხარდამჭერთან ერთად ვაკე-საბურთალოს პოლიციაში იმყოფება და სამართალდამცავებისგან განმარტებებს ითხოვს:

„აქციის ორი მონაწილე, მე, ჩემი ძმა, მალხაზ მაჩალიკაშვილი რომ ხულიგნობის ფაქტზე უნდა დავეკავებინეთ. რის საფუძველზე უნდა დავეკავებინეთ, 11 სექტემბრის შემდეგ დაწყებულია გამოძიება და 11 სექტემბრიდან იმდენი ფაქტი, დარღვევა მოხდა, იმდენი ძალადობის ფაქტი იყო ჩვენ მიმართ პოლიციის მხრიდან კარვების არგაშლასთან დაკავშირებით, იმდენი შეხლა-შემოხლა იყო, რომელ ფაქტთან დაკავშირებით არის ძიება დაწყებული, ამის გასარკვევად ვარ მოსული. პლუს ამას, პოლიციელმა რატომ აიღო თავის თავზე ინიციატივა და დაემუქრა აქციის მონაწილეებს, რომ ხულიგნობის ფაქტზე უნდა დაგიჭირონ. შემდეგ როგორც გავარკვიეთ, არის ვიღაც გიორგი გადელია, არ ვიცი, რა თანამდებობას იკავებს პოლიციაში. ხშირად ყოფილა იქ. ხშირად გამოუჩენია ინიციატივა ჩვენს დარბევაში,“- განაცხადა ზაზა სარალიძემ.