სისხლიანი დაპირისპირება გაჩიანში - ადგილობრივების თქმით, დაპირისპირება ნარკორეალიზატორებსა და მომხმარებლებს შორის მოხდა (ახალი დეტალები)

შემთხვევა - 12:09, 25 Dec, 2018

1497

ქვემო ქართლში სამი ადამიანის დაჭრის ფაქტზე ახალი დეტალები ხდება ცნობილი. ერთ-ერთი დაუდასტურებელი ინფორმაციით, დაპირისპირება ნარკორეალიზატორებსა და მომხმარებლებს შორის მოხდა.

ადგილობეივების თქმით, სასაფლაოს ტერიტორიაზე ნარკოტიკებს ხშირად ყიდიან.

გაჩიანელების მონაყოლის თანახმად, ნარკორეალიზატორები ნარკოტიკულ საშუალებებს მიწაში მარხავენ, შემდეგ აღნიშნულ მისამართს კლიენტებს ეუბნებიან, რომლებიც ნარკოტიკს ადგილზევე მოიხმარენ.

სოფლის მცხოვრებლები სამართალდამცავებს მეტი ყურადღებისკენ მოუწოდებენ. რაც შეეხება გუშინ მომხდარ სისხლიან დაპირისპირებას ისინი აღნიშნევენ, რომ თავდაპირველად გარჩევა და დაპირისპირება ნარკორეალიზატორებსა და მომხმარებლებს შორის მოხდა, კონფლიქტში კი სამი დაჭრილი ახალგაზრდა მოგვიანებით ჩაერთო, რომლებიც ნარკოტიკების გაყიდვას აპროტესტებდა.

"ნარკომანები მოდიან სასაფლაოზე, წამალს გამყიდველები უტოვებენ... დაჭრილებმა ჰკითხეს, რატომ იყვნენ სასაფლაოზე, იმათმა კი უთხრეს რომ ვსეირნობთო. ჩვენებმა უთხრეს წასულიყვნენ, შემდეგ პოლიცია მოვიდა. დაჭერილები პატარა ბიჭები არიან. ჩვენებს იარაღი არ ჰქონდათ, მათ მოიტანეს. მარტო ადგილობრივები არიან დაკავებულები"- აღნიშნავს ადგილობრივი.

გაჩიანში სამი ადამიანის დაჭრაში ბრალდებული დააკავეს - როგორც "ნიუპოსტს" შინსგან საქმეთა სამინისტროდან აცნობეს, გამოძიება საქართველოს სსკ-ის 117-ე მუხლის მე-7 ნაწილის "ა" ქვეპუნქტით და 353-ე მუხლის მე-2 ნაწილით მიმდინარეობს.

შინაგან სამეთა სამინისტროში ამბობენ, რომ გამოძიებამ დაადგინა, რომ სოფელ გაჩიანის მიმდებარე ტერიტორიაზე, ურთიერთდაპირისპირებისას, ზ.ტ.-მ ნაგანის სისტემის პისტოლეტიდან 3 პირი დაჭრა. შემთხვევის ადგილზე ოპერატიულად მისულმა სამართალდამცველებმა ზ.ტ. განაიარაღეს და დაპირისპირებულთა გაშველება დაიწყეს, რა დროსაც, შეკრებილმა მოქალაქეებმა პოლიციელებს წინააღმდეგობა გაუწიეს და ფიზიკური შეურაცხყოფა მიაყენეს. მომხდარის შედეგად, სამართალდამცველებმა 1 პირი ჯანმრთელობის განზრახ მძიმე დაზიანების, 2 მოქალაქე კი ჯგუფის მიერ პოლიციელისთვის წინააღმდეგობის გაწევის ბრალდებით დააკავეს. დანაშაულის ჩადენის იარაღი ამოღებულია ნივთმტკიცების სახით.