„ბავშვი თავზე მიბჯენით არის მოკლული“- სმიტების ოჯახის მკვლელობის ახალი დეტალები

საზოგადოება - 10:03, 24 Dec, 2018

1587

ექსპერტიზის დასკვნის მიხედვით, მალხაზ კობაურის თოფის ლულაზე 4 წლის ქელებ სმიტის დნმ-პროფილი ფიქსირდება და ამავე იარაღზეა მკვლელობაში ბრალდებულის დნმ-ი.

ხადას ხეობაში მომხდარი მკვლელობის საქმის გამოძიების ოფიციალური ვერსიით, მამა-შვილის რაიან და ქელებ სმიტების მოკვლის შემდეგ მალხაზ კობაურმა რაიან სმიტის გვამი მდინარეში გადააგდო, ბავშვის ცხედარი კი თოვლის ზვავის ქვეშ გადამალა.

გადაცემა „იმედის კვირაში“ გასული სიუჟეტის მიხედვით, მალხაზ კობაურის 8 ივლისის ჩვენების შესამოწმებლად ჩატარებული საგამოძიებო ექსპერიმენტის ოქმში აღნიშნულია, რომ გამოძიებას თავად კობაურმა მიუთუთა იმ ადგილზე, სადაც რაიან სმიტის გვამი გადააგდო, კერძოდ მკვლელობის ადგილიდან 1 მეტრის მოშორებით მდინარის კალაპოტში. ხადას ხეობაში 7 საათიანი ექსპერიმენტისას კობაურმა სამართალდამცველებს მკვლელობის ადგილი აჩვენა.

თავდაპირველად გამოძიება მას მხოლოდ მამა-შვილის მკვლელობას ედავებოდა, რასაც ბალისტიკური და ბიოლოგიური ექსპერტიზის დასკვნებიც ამყარებდა. ექსპერტიზის დასკვნაში წერია, რომ თოფის ლულაზე 4 წლის ქელებ სმიტის დნმ-პროფილი ფიქსირდება, ამავე იარაღზეა მალხაზ კობაურის დნმ-ი. დასკვნა ცალსახად ადასტურებს, რომ ბავშვი თავზე მიბჯენით არის მოკლული. რაც შეეხება ბალისტიკურ ექსპერტიზას, დოკუმენტით დგინდება, რომ მკვლელობის იარაღი ვარგისია საბრძოლო მდგომარეობაში მოსაყვანად და ისვრის. ასევე ექსპერტიზამ დაადგინა, რომ შემთხვევის ადგილიდან და გვამებიდან ამოღებული ტყვიის ფინდიხი და საფანტი, სწორედ იმ ტიპის იარაღისთვისაა განკუთვნილი, როგორიც მალხაზ კობაურს ჰქონდა თან.

აღსანიშნავია, რომ მკვლელობის იარაღი მწყემსების დროებითი საცხოვრისიდან დაახლოებით 30 მეტრში, საწვიმარ პლაშში გადახვეული, ბალახებში იყო გადამალული და სამართალდამცველევს ამის შესახებაც თავად მალხაზ კობაურმა უთხრა.

პროკურორ ზაზა დათუკიშვილის თქმით, მას შემდეგ, რაც ბრალდებულმა გაიტყუა რაიან სმიტი, მან მოულოდნელად, ზურგიდან დაახლოებით 150 სმ მანძილიდან ესროლა პირველი ტყვია რაიან სმიტს ზურგის არეში, მეორე გასროლა კი განახორციელა თავის არეში რის შედეგადაც რაიან სმიტი ადგილზე გარდაიცვალა. „ამის შემდეგ ბრალდებული გადაწყვეტს თავიდან მოიშოროს ბავშვი და თავზე ადებს სანადირო თოფს და მიბჯენით ესვრის ტყვიას 4 წლის ბავშვს“,-აღნიშნავს პროკურორი „იმედის კვირასთან“ ინტერვიუში.

19 წლის მწყემსს, მალხაზ კობაურს განსაკუთრებული სისასტიკით ჩადენილი განზრახ მკვლელობა ედება ბრალად. საუბარია ხადას ხეობაში ამერიკისა და საქართველოს ორმაგი მოქალაქეების, რაიან და ლორა სმიტებისა და მათ ოთხი წლის შვილის მკვლელობაზე. ბრალის დამტკიცების შემთხვევაში, კობაურს 16-დან 20 წლამდე ან უვადოდ თავისუფლების აღკვეთა ემუქრება.