3-დღიანი მოლაპარაკების შემდეგ რუსეთი და შეერთებული შტატები სირიაში არსებულ ქიმიურ იარაღზე საერთაშორისო კონტროლის დაწესებისა და მისი შემდგომი განადგურების შესახებ შეთანხმდნენ.

უახლოესი ერთი კვირის განმავლობაში ოფიციალური დამასკო ვალდებულია გამოაქვეყნოს ქიმიური არსენალის სრული ჩამონათვალი და გაეროს დამკვირვებლებს მათი ინსპექტირების საშუალება მისცეს.

ვარაუდობენ, რომ შეთანხმება ძალაში შევა გაეროს რეზოლუციის მიღების შემდეგ, რომელშიც გაწერილი იქნება სანქციები იმ შემთხვევისთვის,თუ ბაშარ ასადის ხელისუფლება თავის ვალდებულებებს არ შეასრულებს, თუმცა მხარეებს განსხვავებული დამოკიდებულება აქვთ ძალის გამოყენებასთან დაკავშირებით ასეთ შემთხვევაში.