მიხეილ გიორგაძეს ავარიის დღე არ ახსოვს - "ხელოვნურ კომაში ჰყავდათ, შოკისგან გული რომ არ გასკდომოდა"

საზოგადოება - 12:27, 12 Dec, 2018

3014

კულტურის ყოფილი მინისტრი და ამჟამინდელი განათლების, კულტურისა და სპორტის მინისტრის პირველი მოადგილე, მიხეილ გიორგაძე, ცოტა ხნის წინ სიკვდილს გადაურჩა. გიორგაძე ავტომობილით ავარიაში მოყვა და 9 დღის განმავლობაში სუნთქვის მართვის აპარატზე იყო მიერთებული. ის ხელოვნურ კომაში იყო, რადგან გონებაზე მყოფი უამრავი ტრავმისგან მიყენებულ ტკივილს ვერ გაუძლებდა.

მიხეილ გიორგაძის მდგომარეობის შესახებ „სარკესთან“ მისი მეგობარი კახაბერ კანდელაკი საუბრობს:

„ცოლ-შვილი ლოპოტაზე ჰყავდა და თვითონაც ჩავიდა. მეორე დღეს კახეთიდან მოდიოდა, როგორც ჩანს, სიბნელეში გზა აერია. ალბათ სწრაფად მოდიოდა და ან სიგარეტს მოუკიდა, ან ტელეფონს დახედა. ტაქსის მძღოლს დაუნახავს ავარია და სასწრაფოში მან დარეკა, თორემ დილამდე ვერ ვიპოვიდით.

მანქანა ამოტრიალებულა. თავი დაარტყა და გაითიშა. უსაფრთხოების ბალიშები რომ გაიბერა, იმან ნეკნები ჩაუმტვრია.

მიშას ავარია არ ახსოვს. ექიმებმა თქვეს, ადამიანს ტვინში რაღაც დამცავი აქვს და ასეთი მომენტები არ ამახსოვრდებაო.

თავიდან გათიშული იყო. მერე გონს მოვიდა, მაგრამ ძალით დააძინეს, რომ თელავიდან თბილისში ჩამოეყვანათ. ტვინი ცოტათი ჰქონდა დაზიანებული, მაგრამ არც მეტყველებაზე უმოქმედია და არც კიდურებზე. ძვლებიც ისე აქვს დამტვრეული, რომ აცდენილი არ იყო და ოპერაციაც არ დასჭირდა“ - ამბობს კახაბერ კანდელაკი.

მისი თქმით, გიორგაძე ამჟამად თურქეთის ერთ-ერთ კლინიკაში იმყოფება და თავს კარგად გრძნობს.