ჟურნალისტ ანა მამულაშვილს მაყურებელი გადაცემა „ერთი ერთის“ წამყვანობიდან იცნობს, თუმცა არავინ იცოდა, რომ ჟურნალისტი მძიმე სენს ებრძოდა. 2013 წელს მას მელანომა დაუდგინდა, რომელიც დაამარცხა, თუმცა 2 წლის შემდეგ დაავადებამ ახლებურად იჩინა თავი. გასული წლის ზაფხულში ფილტზვე გაუკეთდა ოპერაცია და მას შემდეგ ინტენსიური მკურნალობის კურსს გადის თურქეთში, ყოველდღიურად იღებს აბებს, ერთი თვის სამყოფი ამბები კი 7 500 ლარი ღირს.

32 წლის ანას დასახმარებლად ხშირად ტარდება სხვადასხვა საღამოები. 16 დეკემბერს ფილარმონიაში გაიმართება მასშტაბური საქველმოქმედო აქცია და ბილეთებიდან შემოსული თანხა, ანას და კიდევ ორ მძიმედ დაავადებულ ადამიანს გადაეცემა.

„სარკესთან“ ინტერვიუში ანამ მკურნალობასა და გეგმებზეც ისაუბრა.

„13 წლის და 3 წლის შვილები მყავს და როგორ ფიქრობთ, ახლა მაქვს იმის უფლება, ფარდები ჩამოვაფარო, ვიტირო, რომ კიბო მაქვს? ბევრ ჯანმრთელ ადამიანზე უკეთ ვარ ახლა, იმიტომ, რომ მჯერა ამ დაავადებას დავამარცხებ.

მეუღლეს ბევრის მოთმენა და ატანა უწევს, გამიმართლა, რომ გვერდით ასეთი ადამიანი მყავს. დიდ ძალას მაძლევს, რომ ვიბრძოლო და ამ ბრძოლაში გავიმარჯვო“ - ამბობს ანა.

ანა იმასაც იხსენებს, რომ დაავადების დადგენის შემდეგ, საქართველოში ექიმმა არასწორი კურსი დაუნიშნა.

“ექიმმა ქიომიოთერაპიის 6 კურსი დამინიშნა. თან ძალიან პირდაპირ მეუბნებოდა, მე ვიცი, რომ ჟურნალისტი ხარ, ეთერში ზიხარ, მაგრამ უნდა შეეგუო, რომ თმები დაგცვივა, გაყვითლდები, კბილები დაგძვრება და ათასი კოშმარი, მაგრამ რას ვიზამთ, მაინც უნდა გაიკეთოო.

ასეთი გულგრილი დამოკიდებულება იყო ნამდვილი დანაშაული. თურმე, მელანომის მკურნალობისას ქიმიოთერაპია არაფრით შეიძლება. საბედნიეროდ მოვხვდი ონკოლოგ ნია შარიქასეძთან, რომელმაც მითხრა, საქართველოში მეტი არაფერი გამეკეთებინა და თურქეთში წავედი“ - იხსენებს ანა.