ხორავს ქუჩაზე მოზარდების მკვლელობიდან ერთი წელი გავიდა - ტრაგედიას 51-ე სკოლის ორი მოსწავლის, დავით სარალიძისა და ლევან დადუნაშვილის სიცოცხლეები ემსხვერპლა. გამოძიებას მოკლული დავით სარალიძის მკვლელი ამ დრომდე დაკავებული არ ჰყავს.

ზაზა სარალიძე ერთი წელია მისი შვილის მკვლელის დასჯას ითხოვს, თუმცა, უშედეგოდ, რუსთაველის გამზირზე, პარლამენტის შენობასთან შვილმოკლული მამების აქცია გრძელდება. დღეს, 14:00 საათზე, რუსთაველის გამზირზე დაიწყება შეკრება, საიდანაც მსვლელობის მონაწილეები ტრაგედიის ადგილზე მივლენ.

„ერთი წელი გავიდა და ძალიან სამწუხაროა, უფრო მეტი გაჩენილი კითხვა გვაქვს, ვიდრე გაცემული პასუხი. თუნდაც ის ფაქტი, რომ დღემდე ერთი წლის თავზე უცნობია, ვინ მოკლა დავით სარალიძე, არა მარტო ვინ მოკლა, არამედ იმდენი ბუნდოვანებაა შემოსული საქმეში, რომ პასუხის გაცემის გზაც კი ჩვენთვის უცნობია,“ - განაცხადა დავით სარალიძის ოჯახის ადვოკატმა, ნესტან ლონდარიძემ.