ვიცეპოლკოვნიკი გია ცერცვაძე 49 წლის ასაკში ავადმყოფობით გარდაიცვალა. ინფორმაცია ამის შესახებ სოციალურ ქსელში ვრცელდება.

წარმოშობით სოხუმელი გიორგი ცერცვაძე საქართველოს შსს-ის სპეცდანიშნულების რაზმის უფროსის მოადგილე იყო შიდა ქართლში. იგი მონაწილეობდა ქართული მხარის პრაქტიკულად ყველა ბრძოლაში ქვეყნის დამოუკიდებლობის მოპოვების შემდეგ, მათ შორის, 2008 წლის აგვისტოს ომშიც და დაჯილდოებულია სამხედრო მამაცობისთვის.

გიორგი ცერცვაძე 2014-2015 წლებში მოხალისეობრივად იცავდა უკრაინის სახელმწიფოს სუვერენიტეტსა და ტერიტორიულ მთლიანობას უკრაინის ერთ-ერთ ბატალიონში.

გია ცერცვაძე 2017 წლის 15 იანვარს კიევის ჟულიანის აეროპორტში, რუსეთის მოთხოვნით დააკავეს. ცერცვაძეს, რომელიც აფხაზეთისა და 2008 წლის ომების ვეტერანია, რუსეთის ხელისუფლება 2003 წელს მომხდარ მკვლელობაში ადანაშაულებდა, თუმცა მასზე საერთაშორისო ძებნა მხოლოდ 2016 წლის დეკემბერში გამოაცხადა. ცერცვაძის დაკავებას დიდი ვნებათაღელვა მოჰყვა საქართველოში, მისი ადვოკატის და ოპოზიცის წარმამოდგენელთა განცხადებით, ცერცვაძის პირადი მონაცემები რუსეთს საქართველოს ხელისუფლებამ გადასცა. საბოლოოდ ყოფილმა ოფიცერმა საპატიმრო დაწესებულება 26 იანვარს საღამოს დატოვა, ცერცვაძის გათავისუფლებას წინ უძღვოდა უკრაინის პროკურატურის გადაწყვეტილება საქმის შეწყვეტის შესახებ.