გალერეა „ფოტოგრაფიაში“ პირველ დეკემბერს დაგეგმილი იური მეჩითოვის ფოტოგამოფენა გადაიდო. ამის შესახებ პირველ არხი გალერეის დირექტორზე, ნინო-ანა სამხარაძეზე დაყრდნობით საუბრობს.

გამოფენა პირველ დეკემბერს იყო დაგეგმილი.

" განვითარებული მოვლენების ფონზე, ჩვენი ღონისძიების ფეისბუქგვერდზე ძალიან ბევრმა ადამიანმა საკმაოდ აგრესიული, მუქარის შემცველი კომენტარი გააკეთა ხელოვანის მიმართ.

შესაბამისად, გალერეამ ფოტოგრაფის უსაფრთხოების უზრუნველყოფის მიზნით გადადო ღონისძიება“- აცხადებს სამხარაძე.

შეგახსენებთ, კულტურისა და ძეგლთა დაცვის მინისტრის ყოფილი მოადგილისა და ფოტოგრაფ იური მეჩითოვის განცხადებით,1989 წლის 9 აპრილს საბჭოთა კავშირის სადამსჯელო რაზმებს, რუსთაველის გამზირზე ნიჩბებით არავი დაუჩეხავთ და ხალხი ასფიქსიით გარდაიცვალა. მისივე თქმით, საბჭოთა ჯარს, რომელმაც აქცია დაარბია, არ ჰქონდა განზრახვა, რომ ვინმე მოეკლა. მეჩითოვი პასუხისმგებლობას მიტინგების ორგანიზატორებს აკისრებს. ამის შესახებ მან ტელეკომპანია ალ-ჯაზირას მიერ მომზადებულ ფილმში "საბჭოთა იარა" ისაუბრა, რომელიც ეთერში ცოტა ხნის წინ გავიდა. ერთ-ერთ მონაკვეთში მეჩითოვი საბჭოთა კავშირზე საუბრობს და აღნიშნავს, რომ საბჭოთა პერიოდში "ხალხი ბედნიერი იყო."