საქართველოს შინაგან საქმეთა სამინისტრომ ქობულეთში არასრულწლოვნის ქორწინების ფაქტზე გამოძიება დაიწყო.

ქობულეთის მუნიციპალიტეტის ერთ-ერთ სოფელში 15 წლის გოგონა, სრულწლოვან მამაკაცზეგათხოვდა.

როგორც ირკვევა, სკოლის დირექტორს ქორწინების შესახებ შესაბამისი ორგანოებისთვის არ უცნობებია.

„გათხოვების პერიოდში, გოგონა ჩვენს სკოლაში არ ირიცხებოდა. ქორწილში კი იმიტომ ვიყავი, რომ ჩემმა თანამშრომელმა დაგვპატიჟა. რაც არ უნდა პროტესტის გრძნობა გამჩენოდა, მე რა უნდა მექნა? ჩემი პოზიციაა, რომ ბავშვმა სკოლა უნდა დაამთავროს, განათლება მიიღოს და მერე გათხოვდეს, მაგრამ სამწუხაროდ, შვილები არ გვეკითხებიან და გადაწყვეტილების პროცესში თავისუფლები არიან“- განაცხადა დირექტორმა.

შინაგან საქმეთა სამინისტროს ინფორმაციით, საქმე აღძრულია სსკ-ის 140-ე მუხლით, რაც 16 წელს მიუღწეველთან სექსუალურ კავშირს გულისხმობს და 7-დან 9-წლამდე პატიმრობას ითვალისწინებს.

აჭარის უმაღლესი საბჭოს ადამიანის უფლებათა დაცვის კომიტეტის თავმჯდომარე ცოტნე ანანიძე კი ამბობს, რომ არასრულწლოვანი გოგონა მეუღლესთან თანაცხოვრებაში არ იმყოფება.

ანანიძე ამბობს, რომ დაგეგმილი იყო ნიშნობა, თუმცა ფინანსების ეკონომიის მიზნით, ოჯახმა ნიშნობის ნაცვლად, ქორწილი გადაწყვიტა.