„ჩვენი მთავარი დაპირებაა, შევცვალოთ ცხოვრება, ამოვიდეთ ჭაობიდან რომელშიც ვართ და ეს გავაკეთოთ აბსოლუტურად მშვიდობიანად“- დავით ბაქრაძე მხარდამჭერებს აბაშაში შეხვდა

პოლიტიკა - 12:16, 20 Oct, 2018

779

ინვესტიციები და დაცულობა, საზღვარგარეთ მცხოვრები ემიგრანტების ლეგალური დასაქმება, უცხოეთში ქართველი სტუდენტების დაფინანსება, პენსიისა და სოციალური დახმარებების გაზრდა- აღნიშნულ თემებზე ევროპული საქართველოს პრეზიდენტობის კანდიდატმა აბაშაში მხარდამჭერებთან შეხვედრისას ისაუბრა. პროგრამული პრიორიტეტების გარდა დავით ბაქრაძე საზოგადოებას არჩევნებზე მისვლის აუცილებლობაზეც ესაუბრა და მხარდამჭერებს მიმართა, რომ ხვალინდელი საიმედო დღისა და სასიკეთო ცვლილებებისთვის ერთადერთი გზა 28 ოქტომბერს არჩევნებზე მისვლა და საკუთარი აგდაწყვეტილების დაფიქსირებაა.

"სამეგრელოში ისე როგორც არსად სხვაგან, უნდა გვახსოვდეს რამდენად მნიშვნელოვანია, რომ ქვეყანაში იყოს სიმშვიდე, რომ ქვეყანაში უნდა იყოს მშვიდობა და ადგილი არ ქონდეს იმნაირ დაპირისპირებას რომელმაც ქვეყანა ჩააგდო ღრმა უფსკრულში 90იან წლებში. ამიტომ ჩვენი მთავარი დაპირებაა, შევცვალოთ ცხოვრება, წავიყვანოთ ქვეყანა წინ, ამოვიდეთ იმ უძრაობიდან და ჭაობიდან რომელშიც ვართ და ეს გავაკეთოთ აბსოლუტურად მშვიდობიანად. ყოველგვარი დაპირისპირების, ყოველგვარი აგრესიის და შურისძიების გარეშე, ეს ჭირდება დღეს საქართველოს და სწორედ ეს არის ჩვენი ხვალინდელი საიმედო დღე.“ - განაცხადა დავით ბაქრაძემ