ბეტონით შელესილი და ყვითლად შეღებილი ისტორიული გალავანი- რა ელის დამახინჯებულ კულტურულ მემკვიდრეობას და ვანდალური აქტით კმაყოფილ სიღნაღის მერს

საზოგადოება - 12:46, 12 Oct, 2018

2772

კულტურული მემკვიდრეობის სააგენტომ სიღნაღის ისტორიული გალავნის ნაწილის დამახინჯებისთვის სიღნაღის მერია და სამუშაოების მწარმოებელი კომპანია 12 ათასი ლარით დააჯარიმა.

საქმე ეხება სიღნაღის ისტორიული გალავანის დააზიანებას, რომელიც ბეტონით შელესეს და ყვითლად შეღებეს.

კანონდამრღვევებს 12 - 12 ათასი ლარის გადახდა მოუწევთ. სიღნაღის მუნიციპალიტეტს ახალი საპროექტო დოკუმენტაციის შესამუშავებლად კი ექვსი თვე აქვს.

როგორც გაირკვა, ისტორიული გალავანს ე.წ. რეაბილიტაცია კულტურული მემკვიდრეობის დაცვის ეროვნულ სააგენტოსთან შეთანხმების გარეშე ჩაუტარდა. მერიის დავალებითვე მომზადდა პროექტი, რომლის მიხედვითაც ისტორიული გალავანი დაამახინჯეს.

კულტურული მემკვიდრეობის ეროვნული სააგენტომ მომხდარი "გაუცნობიერებელი, უხარისხო და უნებართვო, შესაძლო ვანდალიზმად შეაფასა“.

სააგენტოში განმარტავენ, რომ ოქმი ადმინისტრაციულ სამართალდარღვევათა კოდექსის N88-ე მუხლის მეორე ნაწილის საფუძველზე შედგა, რაც ეროვნული მნიშვნელობის ძეგლზე სამუშაოების წარმოების კანონმდებლობით დადგენილი წესების, შესაბამისი პროექტის ან სხვა სანებართვო პირობების დარღვევას გულისხმობს.

თავად სიღნაღის მერი გიორგი გოგილაშვილი გალავანზე ჩატარებული სამუშაოებით კმაყოფილია და აცხადებს, რომ გალავანი არ დამახინჯებულა, ის განახლდა და გალამაზდა.

„დღესაც ვნახე ეგ მშენებლობა. ეგ არის მიშენება, ტურისტულ ბილიკზე ასასვლელი. ადრეც ასე იყო, ახლა განახლება მოხდა და შევალამაზეთ. რა, ქვებით ხომ არა ავაშენებდი? შეიძლება თქვენთვის არის სიმახინჯე, მაგრამ ჩემთვის არ არის“, - აღნიშნა მერმა „რეგინფოსთან“ საუბრისას.

ამ დროისთვის ისტორიულ გალავანზე სამუშაოები შეჩერებულია. სავარაუდოდ ახალ ნალესობას მოხსნიან და ძეგლს პირვანდელ სახეს დაუბრუნებენ.