მასწავლებელთა პროფესიული განვითარების ეროვნულ ცენტრს თბილისის საბავშვო ბაგა-ბაღების სააგენტოს ხელმძღვანელი კახაბერ გვანცელაძე და თბილისის მუნიციპალიტეტის საკრებულოს განათლებისა და კულტურის კომისიის თავმჯდომარე თამარ ტალიშვილი ეწვივნენ და ცენტრის დირექტორის უფლებების დროებით შემსრულებელ დავით ხვედელიძესთან ერთად სკოლამდელი აღზრდის დაწესებულების მეთოდისტების/სასწავლო პროგრამის კოორდინატორის პროფესიული მომზადების საბაზო კურსის ტრენინგს დაესწრო.

ტრენინგის მიზანია ადრეულ ასაკში ბავშვის სწავლისა და განათლების სახელმწიფო სტანდარტების გაცნობა და შესაბამისად მათში შემავალ ძირითად საკითხებზე მუშაობა. კურსი მოიცავს ისეთ თემებს როგორიცაა ბავშვის განვითარება, კეთილდღეობა, ხარისხიანი პროგრამის დაგეგმვა, წარმართვა, შეფასება, მშობლებთან ურთიერთობა და სხვა.

2018 წელს განათლების, მეცნიერების, კულტურისა და სპორტის სამინისტროს დაკვეთით მასწავლებელთა პროფესიული განვითარების ეროვნულ ცენტრმა შეიმუშავა ტრენინპროგრამა სახელწოდებით - "აღმზრდელ-პედაგოგის პროფესიული მომზადების საბაზო კურსი."

ტრენინგპროგრამაში გათვალისწინებულია შემდეგი თემატიკა: ადრეული განათლების ფილოსოფია, ბავშვის ასაკობრივი განვითარების თავისებურებები, ადრეული და სკოლამდელი აღზრდისა და განათლების სახელმწიფო სტანდარტები და კურიკულუმები, აღმზრდელ-პედაგოგის პროფესიული სტანდარტი, საგანმანათლებლო გარემო, მეთოდოლოგია, ბავშვზე დაკვირვება და შეფასება. ტრენინგპროგრამა 66 საკონტაქტო და 34 არასაკონტაქტო საათისგან შედგება.

პროგრამის ფარგლებში სულ გადამზადდება 602 მეთოდისტი/პროგრამის კოორდინატორი ამ ეტაპზე ტრენინგს გაივლის სკოლამდელი აღზრდის დაწესებულების 170-მდე მეთოდისტი/სასწავლო პროგრამის კოორდინატორი თბილისიდან, სამეგრელოდან და იმერეთიდან.

მიმდინარე წლის ივლისში, ტრენინგი გაიარა 70-მდე სკოლამდელი აღზრდის დაწესებულების მეთოდისტმა/სასწავლო პროგრამის კოორდინატორმა თბილისიდან და ქობულეთდან, რომლებიც შემდეგში ხელს შეუწყობენ ადრეული და სკოლამდელი განათლების სტანდარტების დანერგვას საბავშვო ბაღების აღმზრდელ-პედაგოგებისათვის.

ტრენინგის წარმატებით დსრულების შემდეგ, მონაწილეებს გადაეცემათ ტრენინგის გავლის დამადსტურებელი სერტიფიკატი.