"ეხვეწებოდა წამალის დალევა დამაგვიანდა და ცუდად ვარო"- ბათუმში მოსახლეობა მამაკაცის გარდაცვალებაში პოლიციას ადანაშაულებს

შემთხვევა - 09:54, 08 Oct, 2018

11526

ხმაური იყო გვიან ღამით ბათუმი-სარფის ცენტრალურ მაგისტრალზე. მოსახლეობამ გზაც გადაკეტა. პროტესტის მიზეზი, სოფელ ახალსოფლის მოსახლეობის უკმაყოფილება გახდა. ისინი თანასოფლელის სიკვდილში, საპატრულო პოლიციის თანამშრომლებს ადანაშაულებენ და აცხადებენ, რომ ეკიპაჟის წევრებმა, 65 წლამდე მოქალაქეს წამლის დალევის საშუალება არ მისცეს, რამაც მისი სიკვდილი გამოიწვია.

,,გარდაცვლის ახალსოფლის ცენტრში მაღაზია ჰქონდა. როცა დახურა ობიექტი, პოლიცია აედევნა და სახლში მისულს, ალკოჰოლზე შემოწმება მოსთხოვეს. მან კი პოლიციელებს უთხრა, რომ ავადაა და წამლის მიღების დრო დაუგვინდა. სთხოვა, სახლში შევალ, წამალს დავლევ და გამოვალო, პოლიციამ კი, უარი უთხრა. ამ პროცესში ჩვენი მეზობელი უგონოდ ძირს დაეცა და ადგილზე გარდაიცვალა,“ - აცხადებს ახალოსფლის მკვიდრი, გიგა თედორაძე.

ადგილობრივები სასწრაფო დახმარების ბრიგადას დაგვიანებით მისვლაზეც საუბრობენ.

შსს - მ გამოძება დაიწყო. საქმე გამოსაძიებლად გენინსპექციას გადაეცა.

სამინისტროში აღნიშნავენ, რომ მამაკაცი საპატრულო პოლიციის ეკიპაჟმა სიმთვრალე-სიფხიზლის შემოწმების მიზნით გააჩერა, თუმცა სიმთვრალე არ დადგინდა და მძღოლმა გადაადგილება განაგრძო.

მათივე განცხადებით, მოგვიანებით აღნიშნულ მამაკაცთან დაკავშირებით უწყებაში შეტყობინება შევიდა, შემთხვევის ადგილზე მისულ საპატრულო ეკიპაჟს კი მამაკაცი უგონო მდგომარეობაში დახვდა.

"მიმდინარე წლის 7 ოქტომბერს ბათუმში, ახალსოფელში საპატრულო პოლიციის ეკიპაჟმა სიმთვრალე-სიფხიზლეზე გადამოწმების მიზნით მსუბუქი ავტომობილი შეაჩერა. მანქანის მძღოლი, 1957 წელს დაბადებული ა.ლ. ალკოტესტით შემოწმდა. დადგინდა, რომ ფხიზელი მართავდა საჭეს,რის შემდეგაც მძღოლმა ავტომანქანით გადაადგილება განაგრძო. დაახლოებით 15-20 წუთში მოქალაქეებმა საპატრულო პოლიციის თანამშრომლებს დახმარებისთვის მიმართეს. ადგილზე მისულ სამართალდამცველებს ა.ლ. უგონო მდგომარეობაში დახვდათ. ის სასწრაფო სამედიცინო დახმარების ბრიგადის მიერ საავადმყოფოში მიყვანის შემდეგ გარდაიცვალა. ფაქტზე დაწყებულია გამოძიება საქართველოს სსკ-ის 115 მუხლით, რაც თვითმკვლელობამდე მიყვანას გულისხმობს. გარდაცვალების ზუსტი მიზეზის დასადგენად დანიშნულია შესაბამისი ექსპერტიზები. პოლიციელების მხრიდან სამსახურებრივი უფლებამოსილების შესაძლო გადამეტების ფაქტის შესწავლა შინაგან საქმეთა სამინისტროს გენერალურმა ინსპექციამაც დაიწყო. გამოძიების დასრულებამდე პატრულ-ინსპექტორებს სამსახურებრივი უფლებამოსილება შეუჩერდათ",- აცხადებენ შსს-ში.