"კაპიტანო, სანამ თქვენნაირი აზროვნებისა და შემართების მოქალაქეები გვეყოლება ჩვენი დამარცხება შეუძლებელი იქნება!"- აბაშიშვილი

სოც.მედია - 09:56, 30 Aug, 2018

3829

საქართველოს პრეზიდენტის ადმინისტრაციის უფროსი გიორგი აბაშიშვილი, გურამ კაშიასთან დაკავშირებით განვითარებულ მოვლენებს ეხმაურება და საქართველოს საფეხბურთო ნაკრების ვიცეკაპიტანს მხარდაჭერას უცხადებს:

"ამ ფოტოზე კაპიტნის სამკლაურით ხართ გურამ, ბატონო კაპიტანო: ეხლა ჩემს 8 წლის ქეთუშას ვუყვებოდი თქვენზე (ჩემსავით პირადი შეხვედრის გარეშე გიცნობთ, რადგან ასევე ჩემსავით ჩვენი მთავარი სიამაყისა და ემოციის - საქართველოს ეროვნული ნაკრების არც ერთ თამაშს არ აცდენს), ცხადია მცირე ინტერპრეტირება იყო ჩემს მონაყოლში, თუმცა აღშფოდა თქვენდამი სრულიად დაუმსახურებელ რეაქციაზე (მსუბუქად რომ ვთქვათ, ან ვინ იმსახურებს ამ საკითხზე ესეთ რეაქციას). ორივე ერთ აზრზე ვართ: გვეამაყები, თან ძალიან! და გვინდა თქვენი გაცნობა! უნდა ვთხოვო დახმარება მეგობრებს, რადგან მითხრეს აქ გვერდი გააუქმაო.

და ჩემი რეპლიკა თქვენს კომენტარზე: სანამ თქვენნაირი აზროვნებისა და შემართების მოქალაქეები გვეყოლება ჩვენი დამარცხება შეუძლებელი იქნება!"- წერს გიორგი აბაშიშვილი.

გურამ კაშიას წინააღმდეგ აგრესიის მორიგი ტალღა მას შემდეგ აგორდა, რაც ცნობილი გახდა, რომ საქართველოს ნაკრების ლიდერი უეფა-ს გადაწყვეტილებით, Equal Game-ის ჯილდოს პირველი მფლობელი გახდა. აღნიშნული ჯილდო იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით. ჯილდო გურამ კაშიას 30 აგვისტოს, მონაკოში უეფას ჩემპიონთა ლიგის ჯგუფური ეტაპის წილისყრისას გადაეცემა.

შეგახსენებთ, საქართველოს ნაკრების გამორჩეული ფეხბურთელი და იმ დროისთვის არნემის ვიტესის კაპიტანი გურამ კაშია 2017 წლის ოქტომბერში ჩატარებულ მორიგ მატჩზე ლგბტ დროშის სამკლაურით წარსდგა. ამ ნაბიჯით ის შეუერთდა Stonewall-ის თანასწორობის კამპანიას, რომელიც ლგბტ ადამიანების უფლებების დაცვას ეძღვნება. აღნიშნულ ფაქტს დიდი გამოხმაურება მოჰყვა საქართველოში, ჰომოფობიურად განწყობილმა ჯგუფებმა, გურამ კაშიას ნაკრებიდან გარიცხვა მოითხოვეს და ამ მიზნით რამდენიმე საპროტესტო აქცია ჩაატარეს.