ანაკლიაში დაღუპული 22 წლის ახალგაზრდა საკუთარ სახლში გადაასვენეს

საზოგადოება - 16:34, 25 Aug, 2018

6712

ანაკლიაში დაღუპული გიორგი ნიშნიანიძის ცხედარს ექსპერტიზა ჩაუტარდა. ის უკვე სამტრედიაში, საკუთარ სახლში გადაასვენეს. 22 წლის ახალგაზრდის ახლობლები ამბობენ, რომ ის მუსიკალურ ფესტივალზე რამდენიმე დღის წინ მეგობრებთან ერთად წავიდა. დღეს დილით კი მისი გარდაცვალების შესახებ გაიგეს. მომხდარის ზუსტი მიზეზი მათთვის უცნობია.

გარდაცვლილის ოჯახის წევრები და ახლობლები შინაგან საქმეთა სამინისტროსგან დამატებითი ინფორმაციის მიღებას ელოდებიან, კონკრეტულად რა გახდა ახალგაზრდა მამაკაცის გარდაცვალების მიზეზი.

„ანაკლიაში იყო და დაიღუოა იქო, არაფერი არ ვიცი მეტი ინფორმაცია“- აცხადებს მეზობელი. კიდევ ერთი მეზობლის თქმით, კი გიორგი ნიშნიანიძის დაღუპვის მიზეზი გარკეულის სახის აბის მიღება გახდა.

ახალგაზრდა მამაკაცი, რომელიც ანაკლიაში მიმდინარე ფესტივალზე გარდაიცვალა სამტრედიაში დაბადებული 22 წლის გიორგი ნიშნიანიძეა. ის კავკასიის უნივერსიტეტის სტუდენტი იყო.

''ნიუპოსტის'' ადგილობრივი კორესპოდენტის ცნობით, გარდაცვალების სავარაუდო მიზეზი სინთეტიკური ნარკოტიკის მიღებაა.

უმძიმეს მდგომარეობაში მყოფი ახალგაზრდა სასწრაფო დახმარების ჯგუფს საავადმყოფოში გადაჰყავდა, გატარებული რეანიმაციული ღონისძიების მიუხედავად ექიმებმა მისი გადარჩენა ვერ შეძლეს და ის საავადმყოფოში მიყვანამდე გარდაიცვალა.

შსს-ს ინფორმაციით გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. გარდაცვალების მიზეზის დასადგენად შესაბამისი ექსპერტიზებია დანიშნული.

ანაკლიაში მუსიკალური ფესტივალი ECHOWAVES ტარდება.