ვინ არის 22 წლის ბიჭი, რომელიც ანაკლიის ფესტივალზე დაიღუპა

საზოგადოება - 12:59, 25 Aug, 2018

18029

ახალგაზრდა მამაკაცი, რომელიც ანაკლიაში მიმდინარე ფესტივალზე გარდაიცვალა სამტრედიაში დაბადებული 22 წლის გიორგი ნიშნიანიძეა. ის კავკასიის უნივერსიტეტის სტუდენტი იყო.

''ნიუპოსტის'' ადგილობრივი კორესპოდენტის ცნობით, გარდაცვალების სავარაუდო მიზეზი სინთეტიკური ნარკოტიკის მიღებაა.

უმძიმეს მდგომარეობაში მყოფი ახალგაზრდა სასწრაფო დახმარების ჯგუფს საავადმყოფოში გადაჰყავდა, გატარებული რეანიმაციული ღონისძიების მიუხედავად ექიმებმა მისი გადარჩენა ვერ შეძლეს და ის საავადმყოფოში მიყვანამდე გარდაიცვალა.

შსს-ს ინფორმაციით გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. გარდაცვალების მიზეზის დასადგენად შესაბამისი ექსპერტიზებია დანიშნული.

ანაკლიაში მუსიკალური ფესტივალი ECHOWAVES ტარდება.

ზუგდიდის რეფერალური საავადმყოფოს კლინიკური დირექტორის სულხან ორჟონიას განცხადებით ანაკლიის ფესტივალიდან საავადმყოფოში გადაყვანილ ერთ ახალგაზრდას უცნობი სუბსტანციით ინტოქსიკაციის ნიშნები ჰქონდა.

როგორც ექიმი აცხადებს, ანაკლიის ფესტივალიდან საავადმყოფოში 3 ახალგაზრდა შეიყვანეს, ორი მათგანი: ახალგაზრდა მამაკაცი და გოგონა ფესტივალიდან საგანგებო სიტუაციების მართვის სამსახურის წარმომადგენლებმა გადაიყვანეს, ხოლო ერთი 112--ის ჯგუფმა.

საგანგებო სიტუაციების მართვის სამსახურის წარმომადგენლების მიერ შეყვანილი პირებიდან ახალგაზრდა მამაკაცი კლინიკაში მიყვანის დროს უკვე გარდაცვლილი იყო, ხოლო გოგონა სამედიცინო დაწესებულებიდან მალევე გაწერეს, სამედიცინო დაწესებულება მალე დატოვა მესამე ახალგაზრდამაც.

ამასთანევე, შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის და ცენტრალური კრიმინალური პოლიციის დეპარტამენტის თანამშრომლებმა ერთობლივად ჩატარებული საგამოძიებო ღონისძიებების შედეგად სოფელ განმუხურში მიმდინარე ელექტრონული მუსიკის ფესტივალზე ნარკოდანაშაულისთვის 4 პირი დააკავა.

სამართალდამცველებმა რამდენიმე დღიანი ოპერატიული-საგამოძიებო მუშაობის შედეგად ფესტივალის დაწყებიდან პირველივე დღეს ირანის 2 და საქართველოს 2 მოქალაქე ნარკოტიკული საშუალებების უკანონო შეძენა-შენახვის ბრალდებით დააკავეს.