უკრაინის დამოუკიდებლობის დღესთან დაკავშირებით ჩერნოვეცკის ფონდის დღის ცენტრში საზეიმო კონცერტი გაიმართა

საზოგადოება - 11:21, 24 Aug, 2018

1761

დღეს უკრაინა აღნიშნავს დამოუკიდებლობის 27-ე წლისთავს. 1991 წლის 24 აგვისტოს, უკრაინის უმაღლესმა რადამ დამოუკიდებლობის აქტი მიიღო, რომლითაც უკრაინა დამოუკიდებელ, დემოკრატიულ სახელმწიფოდ გამოცხადდა. ამ ღირსშესანიშნავ თარიღთან დაკავშირებით, ჩერნოვეცკის ფონდის დღის ცენტრში საზეიმო კონცერტი გაიმართა. ფონდის ბენეფიციარების წინაშე წარსდგა უკრაინული სიმღერის ანსამბლი ”Лілея”, რომელიც ორი ათეული წლის წინ საქართველოს დედაქალაქში ჩამოყალიბდა. მისი ხელმძღვანელები არიან ირაკლი მიქელაძე და გალინა კოლესნიჩენკო.

კონცერტზე შესრულებულ იქნა უკრაინული ხალხური და საესტრადო სიმღერები, რომლებმაც მაყურებელთა დიდი მოწონება დაიმსახურეს. აღსანიშნავია, რომ ანსამბლის წევრები არიან უკრაინელი და ქართველი შემსრულებლები, ხოლო სულ ახლახან მას ნიგერიელი ახალგაზრდაც შეუერთდა.

დღის ცენტრის ბენეფიციარებმა მხურვალე ოვაციებით დააჯილდოვეს ანსამბლ ”Лілея”-ს წევრები.

„უკრაინელმა ხალხმა გრძელი გზა გაიარა მისი ქვეყნის სახელმწიფოებრიობის დასაცავად. დარწმუნებული ვარ, რომ საქართველოსა და უკრაინას შორის საუკუნეების მანძილზე ჩამოყალიბებულ მეგობრობაზე დაფუძნებული ურთიერთობები მომავალში კიდევ უფრო განვითარდება“,- განაცხადა ჩერნოვეცკის ფონდის დირექტორმა ოლენა პოლიშუკმა.