ოკუპირებული ცხინვალის ციხეში წამებით მოკლული არჩილ ტატუნაშვილის საქმე - მკვლელობიდან 6 თვის თავზე არჩილ ტატუნაშვილის ოჯახმა სტრასბურგში სარჩელი გააგზავნა. ოჯახი იმედს გამოთქვამს, რომ ევროპული სასამართლო პირველად ვერსიას გაიზიარებს და დაადგენს, რომ არჩილ ტატუნაშვილი წამებით არის მოკლული. სარჩელში ადამიანის უფლებათა დაცვის ერთდროულად რამდენიმე კონვენციის დარღვევაზეა ყურადღება გამახვილებული, რომელზეც პასუხი რუსეთმა უნდა აგოს.

„დასკვნა, რომელიც გახლავთ საერთაშორისო სტანდარტებით შესრულებული და წარმოადგენს მთავარ მტკიცებულებას საქმეში, დიდწილად განაპირობებს იმას, რომ, დაახლოებით, 100%-ით ეს საქმე იქნება მოგებული არჩილ ტატუნაშვილის ოჯახის მიერ. რა თქმა უნდა, ჩვენ ამით ვერ შევუვსებთ იმ დანაკლისს არჩილ ტატუნაშვილის ოჯახს, რაც მათ მიმართ განხორციელდა ასეთი არაადამიანური მოპყრობის შედეგად, თუმცა, ვფიქრობთ, რომ საბოლოოდ მიღწეული იქნება დასჯა დამნაშავე პირების, რადგან ვფიქრობთ, რომ კომპენსაციასთან ერთად, სტრასბურგი დააკისრებს რუსეთის ფედერაციას ამ საქმის გამოძიებას,“ - აცხადებს წამების მსხვერპლთა ფსიქოლოგიური რეაბილიტაციის ცენტრ - ემპათიას დირექტორი, მარიამ ჯიშკარიანი.