შავი ზღვის საერთაშორისო უნივერსიტეტისთვის ავტორიზაციის შეჩერების საკითხი - სასწავლო დაწესებულების რექტორის ილია ჩილოღლუს განცხადებით, ავტორიზაციის საბჭოს მიერ მიღებული გადაწყვეტილება უსამართლოა, რადგან უნივერსიტეტს ფინანსური პრობლემები არ აქვს:

„გვეუბნებიან, რომ დავალიანება გვაქვს და შენობებს ყადაღა ადევს, ამიტომ სტუდენტების მიღების უფლება არ გვეძლევა. ჩვენ ვამბობთ, რომ ეს ჩვენთვის პრობლემას არ წარმოადგენს, თუ სასამართლო გადაწყვეტს, რომ ეს ჯარიმა დაგვეკისრება, მზად ვართ, რომ გადავიხადოთ და ამისთვის შესაბამისი თანხა გვაქვს გამოყოფილი და გვიდევს დეპოზიტზე. აქ არ არის ფინანსური საფრთხე და ის, რომ უნივერსიტეტმა ვერ გააგრძელოს სტუდენტებისთვის განათლების მიცემა. თუ ვთქვათ, მე 700 000 ვალი მაქვს და 800 სტუდენტი ვერ მივიღე, დაახლოებით, 3 მილიონ ლარამდე ზარალში მივდივართ და ლოგიკა სად არის - 700 000 ლარი დავალიანება გაქვს და კიდევ სამ მილიონ ლარს ზარალს გაყენებ?

ამიტომ, ვერანაირად ვერ დავეთანხმებით იმ მოსაზრებას, რომ ჩვენ ამ თანხის გადახდა არ შეგვიძლია. ავტორიზაციის საბჭოს მიერ მიღებულ გადაწყვეტილებას ვაპროტესტებთ და ჩვენს უფლებებს ყველანაირად დავიცავთ. თვითონ საბჭოს წევრმა 4-ჯერ თქვა, რომ ამ უნივერსიტეტს ფინანსური პრობლემა არ აქვს. ჩვენ ყველაფერს გადავიხდით, თუ სასამართლო მიიღებს შესაბამის გადაწყვეტილებას. ჩვენ დოკუმენტაცია მივეცით”,- განაცხადა რექტორმა.