სახელმიწფო უსაფრთხოების სამსახურის უფროსის მოადგილე სოსო გოგაშვილი დღეს თანამდებობიდან გადადგა. აღნიშნულს ხორავას ქუჩაზე მოკლული მოზარდის, დავით სარალიძის მამა ზაზა სარალიძე გამოეხმაურა. სარალიძის განცხადებით, სოსო გოგაშვილი მონაწილეობდა მისი შვილის მკვლელობის საქმის გაყალბებაში:

„ძალიან ბევრი ფაქტები არსებობს, იმასთან დაკავშირებით, რომ პირადად გოგაშვილი ჩარეული იყო არამარტო ჩემი შვილის მკვლელობაში (მკვლელობის საქმეში), არამედ იმ ფაქტთან დაკავშირებით, რაც სტრასბურგში ჩვენი ვიზიტის ჩაშლასთან დაკავშირებით მოხდა.

პირადად გოგაშვილისგან იყო გადაგზავნილი ცრუ ინფორმაცია, რომ სამკაციანი ჯგუფი, რომელიც მიემგზავრებოდა გერმანიაში ერთ-ერთი იყო ტერორიზმში ბრალდებული.

აუცილებლად უნდა დაიწყოს სოსო გოგაშვილის წინააღმდეგ გამოძიება, თუ რა დანაშაულებია ჩადენილი და აუცილებლად უნდა მიეცეს პასუხისგებაში.

მისი თანამდებობიდან გადადგომა არაფერი არ არის, ყველა უნდა მიეცეს პასუხისგებაში თუ ვინმე დანაშაული ჩაიდინა“-აცხადებს ზაზა სარალიძე.