ძლიერი სეტყვა, დატბორილი სახლები და განადგურებული ვენახები კახეთში

ძლიერი სეტყვა, დატბორილი სახლები და განადგურებული ვენახები კახეთში - სოფლები ელექტროენერგიის გარეშე დარჩა

შემთხვევა - 20:56, 18 Aug, 2018

11582

ძლიერმა სეტყვამ ახმეტისა და თელავის მუნიციპალიტეტის სოფლები დააზარალა. ქისტაურში, ახშანსა და მატანში ვენახების დიდი ნაწილი და ერთწლიანი კულტურები თითქმის მთლიანად განადგურებულია. ადგილობრივების თქმით, სანიაღვრე არხები წყალს ვერ ატარებს, რამაც ღვარცობი გამოიწვია.
რაიონში წაქცეულია ხეები, ადგილობრივებს ელექტორენერგია არ მიეწოდებოდათ.

საგანგებო სიტუაციების მართვის სამსახყურის ინფორმაციით, თელავისა და ახმეტის მუნიციპალიტეტებში ამ დროისთვის აღარ წვიმს, წყლის დონემ იკლო - მიმდინარეობს გზების გაწმენდისა და საცხოვრებელი სახლებიდან წყლის ამოტუმბვითი სამუშაოები.

საგანგებო სიტუაციების მართვის სამსახურში თელავიდან და ახმეტიდან შემოსულია 51 შეტყობინება.

ადგილზე მობილიზებული არიან სამაშველო სამსახურის, ადგილობრივი ხელისუფლების, ინფრასტრუქტურისა და რეგიონული განვითარების სამინისტროს წარმომადგენლები.

ძლიერი წვიმისა და სეტყვის შედეგად ორივე მუნიციპალიტეტში დაიტბორა საცხოვრებელი სახლების პირველი სართულები, სარდაფები და ეზოები. პრობლემები შეექმნა ავტომანქანების გადაადგილბასაც.

ძლიერი ნალექისგან შექმნილი პრობლემების გამო არავინ დაშავებულა.