"თედეევი ჩვენი გულშემატკივარია და ვმეგობრობთ" - მოჭიდავეთა ნაკრების მწვრთნელი სკანდალურ ფოტოზე განმარტებას აკეთებს

სოც.მედია - 01:41, 17 Aug, 2018

2322

სოციალურ ქსელში გავრცელებულ ფოტოსთან დაკავშირებით, სადაც საქართველოს მოჭიდავეთა ნაკრები და მთავარი მწვრთნელი, რუსეთის დროშიან მაისურში, ოკუპირებული ცხინვალის დეფაქო დეპუტატთან ერთად არიან გადაღებული, განმარტება გააკეთა გენო პეტრიაშვილმა:
"მოგესალმებით. სოციალურ ქსელებში გავრცელებულ ჩემი და ჩემი თანაგუნდელების ფოტოსთან დაკავშირებით მინდა ვთქვა. ფოტო გადაღებულია 2018 წლის ევროპის ჩემპიონატზე დაღესტანში სადაც ჯაბო თედეევმა გვთხოვა ფოტოს გადაღება თავისივე გამოსახულებიან მაისურით და ჩვენ მეგობრულად დავთანხმდით რადგან ჩვენი
დიდი გულშემატკივარია და ვმეგობრობთ.
მსგავსი მაისურები სუვენირების სახით არის ყველა ჩემპიონატზე. ამ მაისურზე გამოსახულია ჩვენი მეგობარი მოჭიდავე და მხოლოდ ამის გამო გადავიღეთ ეს ფოტო, ეს იყო მხოლოდ მეგობრული ჟესტი. მერწმუნეთ არ მიმიქცევია ყურადღება მაისურის ფერისთვის..
მეც და ჩვენი ნაკრების თითოეულ წევრს ისევე შესტკივა გული ჩვენს სამშობლოზე და დაკარგულ ტერიტორიებზე როგორც ყველა ქართველს!" - წერს გენო პეტრიაშვილი.

„ეს ფოტო დაღესტანში ევროპის ჩემპიონატის მსვლელობისას არის გადაღებული. ფოტოზე რუსეთის ჭიდაობის ნაკრების მთავარი მწვრთნელი ძამბოლატ თედეევია გამოსახული. ეს მაისურები არის სუვენირი, რომელიც ყველა დიდი საერთაშორისო ტურნირის ატრიბუტია. მსგავსი მაისურები იყო თბილისში კარტოზია-ბალავაძის ტურნირზე და რუსეთის ნაკრების თითქმის ყველა წევრი დადიოდა ვლადიმერ ხინჩეგაშვილის მაისურით. ეს პოლიტიკასთან არ არის არანაირ კავშირში. ძამბოლატ თედეევი ჩვენი მეგობარია. ის ყოველთვის და ყველგან ცდილობს, გვიქომაგოს და თუკი რაიმე პრობლემა დგება, ყოველთვის ცდილობს, იყოს ჩვენი ბიჭების მხარდამჭერი. ვიმეორებ, ეს არანაირად არ არის პოლიტიკასთან კავშირში. ეს მეგობრული ფოტოა და მეტი არაფერი“, – აცხადებს გიორგი იანტბელიძე.

იანტბელიძესთან ერთად, ფოტოზე გენო პეტრიაშვილი, ზურაბ იაკობიშვილი და საქართველოს ნაკრების ყოფილი წევრი მამუკა არევაძე არიან.

დაღესტანმა თავისუფალ და ბერძნულ-რომაულ ჭიდაობაში ევროპის ჩემპიონატს 30 აპრილიდან 6 მაისის ჩათვლით უმასპინძლა. ძამბოლატ თედეევი 1968 წელს ცხინვალის რეგიონში დაიბადა. ის 11 წლიდან ჭიდაობას მისდევს. თავისუფალ ჭიდაობაში საბჭოთა კავშირის ჩემპიონი, ევროპის ჩემპიონატის ორგზის გამარჯვებულია. მას მიღებული აქვს რუსეთის ფედერაციის სპორტის ოსტატის ჯილდო. 2001—2012 წლებში იყო რუსეთის ჭიდაობის ნაკრების მთავარი მწვრთნელი. ოთხწლიანი პაუზის შემდეგ, 2016 წლიდან ის კვლავ რუსეთის ნაკრების მთავარი მწვრთნელია.