პანკისის ხეობაში ჩატარებული ანტიტერორისტული სპეცოპერაციის დროს მოკლული 19 წლის თემირლან მაჩალიკაშვილის მამა მალხაზ მაცალიკაშვილი სახელმწიფო უსაფრთხოების სამსახურში გამოკითხვაზე იმყოფებოდა.

მაცალიკაშვილი გამოკითხვაზე ერთ-ერთი აქციის მიმდინარეობისას გაკეთებული განცხადების გამო დაიბარეს. საუბარია განცხადებაზე, როცა მაცალიკაშვილმა აღნიშნა, რომ ის და რამდენიმე პირი სუს-ის შენობასთან ტავის აფეთქებას გეგმავდნენ.

მაჩალიკაშვილმა მოდულის შენობის დატოვების შემდეგ ჟურნალისტებთან საუბრისას აღნიშნა, რომ ეს განცხადება მან ემოციის ფონზე გააკეთა:

„აქ არანაირი დანაშაულის მხრივ არაფერი არ იკვეთება. რაც გავაკეთე განცხადება ის იყო ემოციის ფონზე. მე არც მიფიქრია, არც მქონია გულში... ემოციურ ნიადაგზე გავაკეთე, ჩემს ადგილას სხვაც იტყოდა უფრო გაცილებით მეტს იტყოდა“, - აღნიშნავს მაჩალიკაშვილი.

სუს-ის ბრალდების უსაფუძვლობაზე საუბრობს "ადამიანის უფლებების სწავლებისა და მონიტორინგის ცენტრის" იურისტი. ქეთი ჩუთლაშვილი ხაზგასმით ამბობს, რომ მაჩალიკაშვილის განცხადება ემოციურ ნიადაგზეა გაკეთებული.

„ამ განცხადებაში არანაირი დანაშაულის ნიშნები არ ჩანდა იმიტომ, რომ ჩვენ, ბუნებრივია, ისიც კი არ ვიცით ამ ეტაპისთვის სისხლის სამართლის კოდექსის რომელი მუხლით არის გამოძიება დაწყებული სუს-ში. ჩვენ ამ დრომდე არ მიგვიღია ინფორმაცია მიუხედავად იმისა, რომ მედიებში გამოძიების შესახებ ინფორმაციის გამოქვეყნებისთანავე ჩვენ მივმართეთ საგამოძიებო ორგანოს, რომ განემარტათ, სისხლის სამართლის კოდექსის რომელი მუხლით გათვალისწინებულ ფაქტზე მიმდინარეობდა გამოძიება, თუმცა, საგამოძიებო ორგანოს ამგვარი განმარტება არ გაუკეთებია, შესაბამისად, არანაირ დამატებით ინფორმაციას არ ვფლობთ,“ - აცხადებს ჩუთლაშვილი.