პატრიარქის ქორეპისკოპოსის მეუფე იაკობის განცხადებებს დეკანოზი გიორგი მამალაძის ძმა თორნიკე მამალაძე ეხმაურება. საუბარია მეუფე იაკობის საკვირაო ქადაგებაზე, რომლის ფარგლებშიც მან დეკანოზი „ავაზაკად“ და „დაჯგუფების წევრად“ მოიხსენია.

თორნიკე მამალაძის განცხადებით, იმ შემთხვევაში თუ პრეზიდენტი დეკანოზს შეიწყალებს, ის ბევრ დეტალზე ისაუბრებს:

„ჩემი ძმა გამოსვლისთანავე დაიწყებს იმ თემებზე საუბარს, რის გამოც, ასე რომ ვთქვათ, ციხეში ზის და რაც მეუფე იაკობზე დასაბუთებული ინფორმაციები აქვს. აქედან გამომდინარე, ის არის შეშინებული. იყენებს ამბიონს ბოროტი განზრახვებით. ამბიონი არის საქადაგებელი, რომ ადამიანი ეკლესიაში მიიყვანო და მეუფე იაკობი საპირისპიროს აკეთებს და ამაზე ჩემი აზრით, კიდევ ვიმეორებ, წმინდა სინოდმა პასუხი უნდა მოსთხოვოს,“ - განაცხადა თორნიკე მამალაძემ.

მეუფე იაკობი აცხადებს, რომ დეკანოზი გიორგი მამალაძე იძულებული იყო რუსეთიდან გამოქცეულიყო და მისთვის გაუგებარია, რატომ შეიფარა ის ქართულმა ეკლესიამ. მეუფე იაკობის თქმითვე, დეკანოზ მამალაძეს ავტომობილიც დაუწვეს.

„მანქანის დაწვასთან დაკავშირებით, მანქანა ნამდვილად დამწვარია, მაგრამ გამოძიებამ ვერ დაადგინა ეს თვითონ მანქანის ელექტროსადენებიდან გამომდინარე იყო თუ ვინმემ დაწვა. ეს დასაბუთებული არ არის, ვერც ვერაფერი ვერ ნახეს, რომ დანამდვილებით ეთქვათ, რომ ვიღაცას დამწვარი აქვს. ჩემი ძმა, როგორც მეუფე იაკობმა თქვა ძლივს გადაურჩაო, ჩემი ძმა მანქანაში საერთოდ არ იყო,“ - განაცხადა თორნიკე მამალაძემ.