რუსთავის მერმა აგვისტოს ომში დაღუპული მებრძოლების ხსოვნას პატივი მიაგო

საზოგადოება - 17:00, 08 Aug, 2018

1329

გვისტოს ომის მეათე წლისთავთან დაკავშირებით, რუსთავის მერმა ირაკლი ტაბაღუამ, ქვემო ქართლის ხელმძღვანელ პირებთან და ადგილობრივი თვითმმართველობის წარმომადგენლებთან ერთად, ქვეყნის ტერიტორიული მთლიანობისთვის დაღუპულ გმირთა მემორიალი გვირგვინებით შეამკო და პატივი მიაგო გარდაცვლილი სამხედორების ხსოვნას.

რუსთველმა მიტროპოლიტმა იოანემ (გამრეკელი) გარდაცვლილ მეომართა სულის მოსახსენიებელი პარაკლისი გადაიხადა.

დღესვე, ირაკლი ტაბაღუამ რუსთავის სასაფლაოზე, აგვისტოს ომში გარდაცვლილი სამხედროების - გიორგი ჯავახიშვილის, კახაბერ თავგორაშვილისა და ლევან იოსებიძის, მოგვიანებით კი, თბილისში, ვახტანგ გორგასლის სახელობის ტაძრის ეზოში, ვახტანგ გზირიშვილის საფლავი ყვავილებით შეამკო.

აგვისტოს ომის მეათე წლისთავთან დაკავშირებით, რუსთავის წმ. მეფე ვახტანგ გორგასლის სახელობის ტაძარში სამშვიდობო პარაკლისი აღევლინა. ღვთისმსახურებას მრევლთან ერთად ირაკლი ტაბაღუა დაესწრო.

რუსეთ-საქართველოს ომის მეათე წლისთავისადმი მიძღვნილი ღონისძიება გაიმართა რუსთავის ისტორიულ მუზეუმშიც.

მუზეუმის ეზოში, აგვისტოს ომის ამსახველი ფოტომასალის, რუსეთის აგრესიის შედეგად დაღუპული რუსთაველი გმირების ფოტოებისა და მათი პირადი ნივთების გამოფენა, სპეციალურად დამონტაჟებულ ეკრანზე კი გარდაცვლილი სამხედროების ცხოვრების შესახებ ვიდეორგოლის ჩვენება მოეწყო. საღამოს მუსიკალურად აფორმებდნენ რუსთავის კამერული ორკესტრი და ანსამბლი „ფიროსმანი“.

ღონისძიებას ქალაქისა და მხარის ხელმძღვანელი პირები, რუსთაველი გმირების ოჯახის წევრები, სამხედრო მოსამსახურეები და ყოფილი მებრძოლები დაესწრნენ.

2008 წლის რუსეთ-საქართველოს ომში გარდაცვლილი რუსთაველი სამხედროები, ვახტანგ გზირიშვილი, ლევან იოსებიძე და გიორგი ჯავახიშვილი IV ქვეითი ბრიგადის 42-ე ბატალიონში იბრძოდნენ, ხოლო კახაბერ თავგორაშვილი გულუას სახელობის სპეცდანიშნულების რაზმში მსახურობდა. გარდაცვალების შემდეგ, ოთხივე მათგანი ვახტანგ გორგასლის სახელობის პირველი ხარისხის ორდენითაა დაჯილდოებული.