„რუსთავი 2“- ის გენერალური დირექტორი, ნიკა გვარამია უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძის გადადგომას ეხმაურება.

გვარამიას შეფასებით, გვენეტაძემ „ისტორიაში ყველაზე სამარცხვინო სასამართლო სისტემის შექმნაში დიდი წვლილი შეიტანა“.

“ნინო გვენეტაძე გადადგა. ჯერ თავი მოიჭრა, ქვეყნის ისტორიაში ყველაზე სამარცხვინო სასამართლო სისტემის შექმნაში დიდი წვლილი შეიტანა, პოლიტიკური პატიმრები დააგროვა, რუსთავი 2ის საქმეზე სამარცხვინო გადაწყვეტილებით სამუდამოდ "დაიმშვენა" საკუთარი ბიოგრაფია, ბოლოს დეკანოზ მამალაძეს გამოუტანა პოლიტიკური განაჩენი და გაიქცა.

იმედი მაქვს, არავინ შეუშვებს აუდიტორიაში სტუდენტების მოსაწამლად, და თუ მაინც შეუშვეს, ერთი გამბედავი და ნათელი სტუდენტი მაინც შეხვდება, რომელიც პომიდორებს ან კვერცხებს დაუშენს“- აღნიშნავს ნიკა გვარამია.

უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძე დაკავებულ თანამდებობას ტოვებს.

გვენეტაძე გადადგომის მიზეზად ჯანმრთელობის მდგომარეობას ასახელებს.