საზარელი კადრები ცხოველთა თავშესაფრიდან - დახოცილი ძაღლები და ყურადღების გარეშე დარჩენილი მომაკვდავი ლეკვი

საზოგადოება - 15:53, 30 Jul, 2018

1469

ცხოველთა თავშესაფრის საზარელი კადრები, რომელიც სოციალურ ქსელში გავრცელდა - განმარტებები ცხოველთა მონიტორინგის სამსახურის უფროსმა კიდევ ერთხელ გააკეთა. ვახტანგ ლომჯარია ფიქრობს, რომ ვიდეომასალა თავშესაფრის იმ ყოფილმა თანამშრომლებმა გაავრცელეს, რომლებიც ცხოველების მიმართ გულგრილები იყვნენ.

ლომჯარიას განცხადებით, რეორგანიზაციის დროს არაკვალიფიციური რამდენიმე თანამშრომელი გაათავისუფლეს, ის ასევე არ გამორიცხავს, რომ შესაძლოა სხვა ვიდეომასალებიც არსებობდეს.

„ჩვენი ინფორმაციით, მსგავსი ტიპის ვიდეოები არის დაგროვებული, არის გადაღებული დაინტერესებული ჯგუფების მიერ, რომლებიც მიზნად ისახავენ სააგენტოს დისკრედიტაციას, ჩვენი მიზანია გავწმინდოთ სააგენტო იმ თანამშრომლებისგან, რომლებიც გულგრილები არიან, რომლებმაც თუნდაც დაინახეს მსგავსი ფაქტი და არ მოახდინეს რეაგირება. სააგენტოში თანამშრომლები მუდმივად იცვლებიან, მოდიან უკეთესი კადრები, ვინც ვერ ასრულებს საკუთარ მოვალეობას ისინი ტოვებენ სააგენტოს“, - განაცხადა ლომჯარიამ.

შეგახსენებთ, რომ გავრცელებულ კადრებში ცხოველთა თავშესაფარში არსებული ვითარებაა ასახული. აქ, დახოცილ ძაღლებთან ერთად, ჩანს მომაკვდავი ლეკვიც, რომელიც ყურადღების გარეშეა მიტოვებული.