მთათუშეთში მომხდარი უბედური შემთხვევა - კლდიდან გადავარდნილი 11 წლის ბავშვის მდგომარეობა მძიმეა. იაშვილის კლინიკის ანესთეზია-რეანიმაციის დეპარტამენტის ხელმძღვანელმა, გია ბიბილაშვილმა ჟურნალისტებთან საუბრისას განაცხადა, რომ მიმდინარეობს მოზარდის სისცოცხლის გადარჩენისთვის ბრძოლა:

"კატასტროფის ბრიგადის მიერ პაციენტი ჩვენთან შემოყვანილია მრავლობითი დაზიანებებითა და მძიმე ნევროლოგიური სტატუსით. მას ჩაუტარდა გარკვეული კვლევები და შესაბამისი დარგის სპეციალისტების კონსულტაციები. აღმოჩნდა, რომ პაციენტს აღენიშნება მრავლობითი ტრავმული დაზიანება, მათ შორის სისხლჩაქცევა თავის ტვინში, თავის ტვინის შეშუპება, სახის ძვლების დაზიანება, თუმცა რაიმე სახის ქირურგიული ჩარევა ამ მომენტისთვის არ განიხილება. პაციენტი კვლავ რჩება ფილტვის ხელოვნურ ვენტილაციაზე (ხელოვნურ სუნთქვაზე). გრძელდება მისთვის გეგმური საძილე და ტკივილგამაყუჩებელი პრეპარატების მიცემა,"- განაცხადა გია ბიბილაშვილმა.

ექიმის თქმით მოზარდს უტარდება მისი სიცოცხლის გადასარჩენად საჭირო ყველა პროცედურა:

"ამ ეტაპზე მიმდინარეობს ბრძოლა როგორც მისი ტვინის დარჩენილი უჯრედების შესანარჩუნებლად, ასევე მთლიანად მისი სიცოცხლის გადასარჩენად. თავის ტრავმების მკურნალობა მოხდება მისი კლინიკური და ინსტრუმენტული კვლევის შედეგების კორელაციის მიხედვით. ამ ეტაპზე პაციენტს უკეთდება ყველაფერი, რაც მულტიპროფილურმა გუნდმა ჩათვალა საჭიროდ,"- განაცხადა გია ბიბილაშვილმა.