თავისუფალ ჭიდაობაში პირველი ქართველი მსოფლიო ჩემპიონი ვახტანგ ბალავაძე დღეს, 91 წლის ასაკში გარდაიცვალა.

ვახტანგ ბალავაძე იყო საბჭოთა კავშირის ხუთგზის ჩემპიონი თავისუფალ ჭიდაობასა და სამბოში, მსოფლიოს ორგზის ჩემპიონი და ვერცხლის პრიზიორი, მელბურნის ოლიმპიური თამაშების ბრინჯაოს მედალოსანი. სპორტის დამსახურებული ოსტატი, საქართველოს და საბჭოთა კავშირის დამსახურებული მწვრთნელი, ვახტანგ გორგასლის II ხარისხის ორდენის კავალერი.

ამას გარდა მან დიდ წარმატებას მიაღწია სამწვრთნელო ასპარეზზეც. ათწლეულებია თბილისი მისი სახელობის პრესტიჟულ საერთაშორისო ტურნირს მასპინძლობს.

ჭიდაობის განვითარებაში შეტანილი განსაკუთრებული წვლილისთვის ვახტანგ ბალავაძე 1997 წელს დაჯილდოვდა ჭიდაობის საერთაშორისო ფედერაციის FILA–ს ოქროს ორდენით.

ვახტანგ ბალავაძე საქართველოში სპორტისა და ოლიმპიური მოძრაობის განვითარებაში შეტანილი განსაკუთრებული წვლილისათვის, დაჯილდოებულია საქართველოს ოლიმპიური კომიტეტის ორდენით.