პოლიციელები ქუჩაში მცხოვრებ ბავშვებს დანაშაულის საკუთარ თავზე აღებისკენ უბიძგებენ

პოლიციელები ქუჩაში მცხოვრებ ბავშვებს დანაშაულის საკუთარ თავზე აღებისკენ უბიძგებენ - UNICEF

საზოგადოება - 19:01, 24 Jul, 2018

2013

პოლიციელები ქუჩაში მცხოვრებ ბავშვებს დანაშაულის საკუთარ თავზე აღებისკენ უბიძგებენ. ამის შესახებ გაეროს ბავშვთა ფონდის მიერ დღეს გამოქვეყნებულ კვლევაშია საუბარი.

როგორც კვლევაშია საუბარი, ბავშვთა ზოგიერთ ჯგუფს ისეთი შიდა სტრუქტურა აქვს, რომელიც ბავშვებს ხელმძღვანელი/უპირატესი სტატუსის მქონე ბავშვებად და დაქვემდებარებულ ბავშვებად ყოფს: ურთიერთდაცვის და დახმარების პროცესში ბავშვები სუბორდინაციულ სტრუქტურებს ქმნიან.

ბავშვებისა და მოზარდების მონაყოლის მიხედვით, ამის მეორე მხარე ისაა, რომ მაღალი სტატუსის მქონე ბავშვები დაქვემდებარებულ ბავშვებს „ფარად“ იყენებენ - დანაშაულის ჩადენას აიძულებენ და ამ გზით მიღებულ შემოსავალს ართმევენ. ხშირად ეს საქმიანობა ისეა ორგანიზებული, რომ დანაშაულს (როგორიცაა, მაგალითად, მაღაზიაში ქურდობა, მანქანების გატეხვა და იქიდან ნივთების მოპარვა) უმცროსი ასაკის ბავშვები ჩადიან, ხოლო უფროსი ბავშვები სადარაჯოზე დგანან და უმცროსებს მათთვის ნაძარცვი მოაქვთ. ასეთი პრაქტიკა იმ გარემოებას უკავშირდება, რომ საქართველოს კანონმდებლობის თანახმად 14 წლამდე ასაკის ბავშვთა მიმართ სისხლისსამართლებრივი დევნა არ გამოიყენება. შესაბამისად, უფროსი ბავშვები დანაშაულებრივი ქმედებებისთვის უმცროს ბავშვებს იყენებენ სისხლისსამართლებრივი დევნის თავიდან აცილების მიზნით.

კვლევის თანახმად, "როგორც ჩანს, პოლიცია იყენებს სამართლებრივი დევნისთვის დადგენილ მინიმალურ ასაკს (14 წელს), რაც ქუჩის ბავშვთა ჯგუფში „უპირატესი სტატუსის“ მქონე ბავშვებს სტიმულს უქმნის, კრიმინალური მიზნებისთვის უმცროსი ასაკის ბავშვები გამოიყენონ."

ბავშვების მონაყოლის მიხედვით, ქურდობასთან ან რაიმე სხვა დანაშაულთან დაკავშირებით ბავშვების ჯგუფის დაპატიმრების შემთხვევაში პოლიციის ოფიცრები ხშირად ასკვნიან, რომ დანაშაული 14 წლამდე ასაკის ბავშვმა ჩაიდინა ან არწმუნებენ ამ ბავშვებს, დანაშაული თავის თავზე აიღონ. მოზარდები ვარაუდობენ, რომ ამ გზით პოლიციელები დოკუმენტაციის გაფორმებას და ბავშვების პასუხისგებაში მიცემასთან დაკავშირებულ შემდგომ სამუშაოს იცილებენ თავიდან.