ტაჯიკმა გოგონამ, რომელმაც საქართველოში იმშობიარა, შვილს ექიმის სახელი დაარქვა

სოც.მედია - 16:01, 17 Jul, 2018

4113

სოციალურ ქსელში თბილისის სასწრაფო სამედიცინო დახმარების ცენტრი ტაჯიკი გოგონას შესახებ წერს.

"ახალშობილ ტაჯიკ გოგონას ექიმის სახელი - ბელა დაარქვეს. ჩვენს ექიმებს, თავიანთი საქმიანობიდან გამომდინარე, უამრავ შემთხვევასთან უწევთ შეხვედრა. ადამიანების გადარჩენა მათი ყოველდღიურობაა, მაგრამ გაცილებით სასიხარულო და პოზიტიურია, როდესაც სამყაროს ახალი სიცოცხლე ევლინება და ამაში მონაწილეობას იღებ.

დღეს ჩვენი იტორიის გმირები ბრიგადა 1112- უფროსი ექიმი ბელა როსტომაშვილი, უმცროსი ექიმი მაია ვალშაკოვა და მძღოლი გია გოგრიჭიანია. გამოძახების ადგილზე მისულ ბრიგადას უცხო ქვეყნის მოქალაქე, 28 წლის ქალი დახვდათ, რომელსაც მშობიარობა უკვე დაწყებული ჰქონდა. იყო ენის ბარიერიც: ახალგაზრდა ცოლ-ქმარმა ქართული ენა არ იცოდა, ხოლო უცხოურ ენებში ძალიან მწირი ლექსიკა ჰქონდათ. გაირკვა, რომ ცოლ-ქმარი საქართველოში სამოგზაუროდ იყო ჩამოსული.

უფროსი ექიმის ხანგრძლივი სამედიცინო პრაქტიკის მიუხედავად, მისთვის პირველი შემთხვევა იყო, რომ მშობიარობა უნდა მიეღო.ბინიდან ძლივს მოასწრეს ეზოში ჩამოსვლა და სასწრაფოს მანქანაში ჩასხდომა, როდესაც პაციენტს ინტენსიური ტკივილები დაეწყო და სულ რაღაც რამდენიმე წამში მანქანაშივე იმშობიარა. დაიბადა ჯანმრთელი გოგონა. ახალგაზრდა ქალისათვის ეს მეორე მშობიარობა იყო.

საოცარი იყო გულშემატკივარი მეზობლების ემოცია.

ბედნიერი მშობლების გადაწყვეტილებით, პატარა გოგონას ექიმის სახელი - ბელა დაარქვეს.

დედა-შვილი თავს კარგად გრძნობს.

თბილისის სასწრაფო სამედიცინო დახმარების ცენტრი ულოცავს ახალგაზრდა ოჯახს მეორე შვილის დაბადებას!" - წერს თბილისის სასწრაფო სამედიცინო დახმარების ცენტრი.