"აგრესიულად მიმართა... ერთ წუთში თმაში წვდა გოგონას და შეიქმნა გულის ამრევი სიტუაცია"

"აგრესიულად მიმართა... ერთ წუთში თმაში წვდა გოგონას და შეიქმნა გულის ამრევი სიტუაცია" - რა მოხდა არტ-გენზე

სოც.მედია - 13:57, 17 Jul, 2018

7268

სოციალურ ქსელში გიორგი მაჭარაძე "არტ-გენზე" წერს.

“არ შემიძლია გამოხმაურების გარეშე დავტოვო ინციდენტი, რომელიც გუშინ (15.07.2018), არტ-გენის დახურვაზე, ჩემს თვალწინ მოხდა.

ნიაზმა საკუთარ ბენდთან ერთად დაიწყო თუ არა დაკვრა, მომენტალურად, ქალბატონმა, რომელიც სცენიდან მოშორებით იჯდა, საკმაოდ აგრესიულად მიმართა სცენასთან ახლო მდგარ გოგონას - ხელს მიშლი ყურებაში და დაჯექიო, რაც არტ-გენისთვის საკმაოდ უხრხული მიმართვა გახლავთ, მაგრამ ყურადღება არ მიაქცია სცენასთან მყოფმა გოგონამ. ქალბატონმა მეორედ უფრო მეტი აგრესით მიმართა და დაემუქრა - დაჯექი, გირჩევნია, მანდ არ ჩამომიყვანოო. ამის თქმა და ჩასვლა ერთი ქნა. პირადად რას ესაუბრებოდა, უფრო სწორად სიტყვიერად რას ეჩხუბებოდა, ვერ გავიგე, მაგრამ ერთ წუთში თმაში წვდა გოგონას და შეიქმნა ის გულის ამრევი სიტუაცია, რასაც ქალების ჩხუბი ჰქვია!

ბევრი რომ არ ვისაუბრო, თავდამსხმელს ბევრად კარგად მოხვდა და ბოლოს მუზეუმის დაცვამ დაამშვიდა სიტუაცია.

დიდი ალბათობით, ეს ქალბატონი პირველად გახლდათ არტ-გენზე, რომელსაც წარმოდგენაც არ ჰქონდა, რომ ეს ფესტივალი თავიდან ბოლომდე სიყვარულს, მშვიდობას, პატივისცემასა და თანადგომას ქადაგებს დაარსებიდან აგერ მეთხუთმეტე წელია. ფესტივალის ყველა მონაწილე და ყველა წამყვანი მხოლოდ სიყვარულზე და ერთმანეთის გვერდით დგომაზე უკრავს, მღერის და საუბრობს. კი, ბატონო, არტ-გენი სწორედ ის ფესტივალია, სადაც ყველა სტუმარი ერთმანეთს ადგილს ვუთმობთ და ლუკმას ვუნაწილებთ. წვიმაში ჩვენთვის წაღებულ ქოლგას ვუთმობთ უქოლგოდ მოსულ, სრულიად უცხო ადამიანს, ან ორივე ერთი ქოლგის ქვეშ ვთავსდებით. სიცხეში წყალს ვჩუქნით, მუდმივად კი ღიმილს, სიყვარულს და პატივისცემას.

თხუთმეტი წელია არც-ერთი არტ-გენი გამომიტოვებია და მსგავსი უმსგავსობა არასდროს მინახავს. ძალიან სამარცხვინო საქციელი იყო და ის ქალბატონი იმედია ოდესმე მიხვდება, რომ არტ-გენზე ყველა ერთმანეთს ვეფარებით და ვეფერებით, ვცეკვავთ ან ვსხედვართ არაკომფორტულ ადგილზე, უმეტესი ნაწილი ბალახზე ან ასფალტზე, ზოგიც არაკომფორტულ იარუსზე და ეს არტ-გენისთვის ჩვეულებრივი მომენტია, რადგან კომფორტულად დაჯდომისთვის არავინ დავდივართ იქ.

დიდი მადლობა არტ-გენის ყველა ორგანიზატორს, მონაწილეს და ჯგუფ 33ა-ს გუშინდელი უმაგრესი კონცერტისთვის!” - წერს გიორგი მაჭარაძე.