ტყიბულში მომხდარი ტრაგედია - არასამთავრობო სექტორი პარლამენტს და აღმასრულებელ ხელისუფლებას მიმართავს

საზოგადოება - 18:47, 16 Jul, 2018

1362

საქართველოში მოქმედი 4 ყველაზე გავლენიანი და ცნობილი ორგანიზაცია ტყიბულში მომხდარი ტრაგედიის ობიექტურ გამოძიება მოითხოვს.

მესამე სექტორში თვლიან, რომ პარლამენტში უნდა შეიქმნას საგამოძიებო კომისია, რომელიც ბოლო ერთი წლის განმავლობაში, ტყიბულის სხვადასხვა შახტში დაღუპული 15 ადამიანის გარდაცვალების და მომხდარი ტრაგიკული შემთხვევების მიზეზებს გაარკვევს.

მათი თქმით, შინაგან საქმეთა სამინისტროს მიერ წარმოებული გამოძიებიდან ამ დრომდე არავის პასუხისმგებლობის საკითხი არ დამდგარა.

„ჩვენ ვდგავართ, როგორც შრომის პოლიტიკის, ასევე სისხლის სამართლის მნიშვნელოვანი ჩავარდნის წინაშე. ჩვენ ტყიბულში და არა მხოლოდ ტყიბულში, საქმე გვაქვს განგრძობად და სისტემურ დანაშაულთან, რომელიც არის მართული დასაქმებულების წინააღმდეგ. არც ერთ შემთხვევაში ტყიბულში, ჩვენ არ ვიცით, გამოძიებამ რაიმე შედეგი დადო თუ არა. ვფიქრობთ, რომ უნდა შეიქმნას დროებითი საგამოძიებო კომისია. შევეცდებით, რომ გამოვიყენოთ ყველა მექანიზმი, იმისთვის, რომ პოლიტიკური ხელისუფლება ვაიძულოთ ამგვარი გადაწყვეტილებები მიიღოს,“ - განაცხადა ადამიანის უფლებების სწავლებისა და მონიტორინგის ცენტრისსოციალური პოლიტიკის პროგრამის დირექტორმა, ლინა ღვინიანიძემ.

საქართველოს ახალგაზრდა იურისტთა ასოციაციის თავმჯდომარე, სულხან სალაძე, დროებითი საგამოძიებო კომისიის შექმნის მნიშვნელობაზე საუბრობს.

„აუცილებელია, ვიცოდეთ, ასეთ შემთხვევაში რას უკავშირდებოდა გამოძიების არაეფექტურობა. ეს იყო, უბრალოდ, პოლიტიკური ნების არარსებობა, რომ ამ საქმეებზე გამოძიება ყოფილიყო ბოლომდე მიყვანილი, თუ უბრალოდ სხვა მომენტთან გვქონდა ჩვენ შეხება,“ - განაცხადა სულხან სალაძემ.