შახტაში დაშავებული 2 პირი რეანიმაციულ განყოფილებაში იმყოფება - მეშახტეების ჯანმრთელობის მდგომარეობა მძიმეა

საზოგადოება - 16:06, 16 Jul, 2018

1426

ტყიბულში, მინდელის სახელობის შახტაში დაშავებული მეშახტეები, რომლებიც დამწვრობის ცენტრში გადმოიყვენეს მატი ჯანმრთელობის მდგომარეობა მძიმეა.

დამწვრობის ცენტრის ხელმძღვანელის გუგა ქასიბაძის ინფორმაციით, ერთ-ერთ დაშავებულს სხეულის 25% აქვს დამწვარი.

„ამ წუთისთვის შემოვიდა ჩვენთან 30 წლის მამაკაცი, რომელმაც სხეულის დაზიანება მიიღო შახტაში. სხეულის 25% აქვს დამწვარი. მეორე, მესამე ან მესამე „ბ“ ხარისხის დამწვრობაა. დამწვარი აქვს თავი, მტევნები, წინა მხრები, ქვემო კიდურებზე მცირე უბნები. ასევე აღენიშნება სასუნთქი გზების თერმულ-ინჰალაციური დაზიანება, თერმული შოკი. მისი მდგომარეობა საკმაოდ სერიოზულია. მოთავსებულია დამწვრობის ცენტრის რეანიმაციულ განყოფილებაში" - აღნიშნა გუგა ქაშიბაძემ.

შემთხვევა ტყიბულში, მინდელის სახელობის შახტში დღეს დილით მოხდა, რომლის დროსაც 4 მეშახტე დაიღუპა, 6 კი დაშავდა.

მათი ჯანმრთელობის მდგომარეობა მძიმეა. სავარაუდოდ, ტრაგედიის მიზეზი მეთანის დაგროვება გახდა, რომელმაც აფეთქება გამოიწვია.

კომპანია საქნახშირის უსაფრთხოების უფროსის თქმით, შახტში უსაფრთხოების ნორმები დაცული იყო.

შახტი წინა 5 აპრილის შემთხვევის გამო დალუქული იყო და გუშინ გაიხსნა.

იმერეთის, რაჭა-ლეჩხუმის და ქვემო სვანეთის პოლიციის დეპარტამენტის დირექტორის ბესიკ ამირანაშვილის ინფორმაციით, გამოძიების დასრულებამდე ტყიბულში არსებული 25-ვე შახტი დაილუქება.

შინაგან საქმეთა სამინისტრომ მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.