"ვგლოვობ თითოეულ შეწყვეტილ სიცოცხლეს"-კახა კალაძე

სოც.მედია - 16:10, 16 Jul, 2018

1531

თბილისის მერი, კახა კალაძე ტყიბულის შახტში დატრიელებულ ტრაგედიას ეხმაურება:
"მორიგი ტრაგედია დატრიალდა მაღაროელების ქალაქში... მორიგი მსხვერპლი, დაშავებულები...
ვიზიარებ დაღუპულთა ოჯახების ტრაგედიას, ვგლოვობ თითოეულ შეწყვეტილ სიცოცხლეს და ჩემი დღევანდელი პოზიციიდან ძალისხმევას არ დავიშურებ, რომ ჩემი წვლილი შევიტანო შრომის უსაფრთხოების სწორი და საჭირო სტანდარტების ერთხელ და საბოლოოდ დამკვიდრებაში"- წერს თბილისის მერი.

მინდელის სახელობის შახტში 4 მეშახტე დაიღუპა, 6 კი დაშავდა, რომელთა მდგომარეობა მძიმეა. სავარაუდოდ, ტრაგედიის მიზეზი მეთანის დაგროვება გახდა, რომელმაც აფეთქება გამოიწვია.

კომპანია საქნახშირის უსაფრთხოების უფროსის თქმით, შახტში უსაფრთხოების ნორმები დაცული იყო.

შახტი წინა 5 აპრილის შემთხვევის გამო დალუქული იყო და გუშინ გაიხსნა.

იმერეთის, რაჭა-ლეჩხუმის და ქვემო სვანეთის პოლიციის დეპარტამენტის დირექტორის ბესიკ ამირანაშვილის ინფორმაციით, გამოძიების დასრულებამდე ტყიბულში არსებული 25-ვე შახტი დაილუქება.

შინაგან საქმეთა სამინისტრომ მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.