გამოცდების ეროვნული ცენტრის სკანდალი - გასაჯაროვდა თუ არა გამოცდებამდე სამაგისტროს პასუხები?!

საზოგადოება - 09:40, 13 Jul, 2018

3567

გამოცდების ეროვნულმა ცენტრმა ვებ-გვერდზე შემთხვევით, სავარაუდოდ, სამაგისტრო გამოცდების სამომავლო ტესტირების პასუხები რამდენიმე წუთით გამოაქვეყნა. საუბარია მაგისტრატურის B და C ტესტის ტიპებზე, რომელიც 18-19 და 24-25 ივლისს უნდა ჩატარდეს. 11-12 ივლისს A ტესტის ტიპის გამოცდა ჩატარდა - ამის შესახებ ინფორმაცია ინტერნეტმომხმარებლებმა და მედიამ გაავრცელეს. B და C ტესტირების პასუხები გამოცდების ეროვნული ცენტრის ვებგვერდზე რამდენიმე წუთის განმავლობაში იდო, სტუდენტებმა მისი "სქრინის" შენახვა მოასწრეს. ამ ეტაპისთვის ტესტირებების პასუხები ვებგვერდზე არ იძებნება.
აღნიშნულთან დაკავშირებით განმარტებას გააკეთა შეფასებისა და გამოცდების ეროვნული ცენტრმა, მათი განცხადებით ფაილში მოცემული დამატებითი ინფორმაცია არ არის საგამოცდო ტესტის ვერსიების სწორი პასუხები:

“ცენტრის ვებგვერდზე www.naec.gov.ge გამოქვეყნებულია A ტიპის სამაგისტრო ტესტი და A ტიპის ტესტის პასუხები. გვერდის მობილურ ვერსიაზე ვიზიტორები არაკორექტირებულ ფაილს ხედავდნენ, რამაც დაბნეულობა გამოიწვია. განვმარტავთ, რომ ფაილში მოცემული დამატებითი ინფორმაცია არ არის საგამოცდო ტესტის ვერსიების სწორი პასუხები, რაშიც არა მხოლოდ აპლიკანტები, არამედ ნებისმიერი მსურველი დარწმუნდება ტესტების და სწორი პასუხების გამოქვეყნებისას.”- აღნიშნულია გამოცდების ცენტრის განცხადებაში.

ცნობისთვის გუშინ და დღეს მაგისტრობის მსურველებმა A ტიპის ტესტი წერეს და გამოცდების ცენტრმა შესაბამისი ტესტებისა და პასუხების გამოქვეყნება რამდენიმე საათით დააგვიანა. სწორედ ამის შემდეგ გახდა ცნობილი ზემოთ თქმული ფაქტის შესახებ.